ԵՐԵՎԱՆ, 1 փետրվարի-Sputnik. 2016 թվականի հունվար-դեկտեմբեր ամիսների նախնական ամփոփ ցուցանիշներով` Հայաստանում ծնվել է 40 հազար 638 երեխա։ Սակայն, ցավոք, այս ցուցանիշը 2.7 տոկոսով նվազել է։ Ընդ որում` 112 տղայի դիմաց ծնվել է 100 աղջիկ։
Տեղեկացնենք, որ ծնելիության ամենաբարձր ցուցանիշներով առաջատար է մնում Երևանը։ Մայրաքաղաքին մի փոքր զիջում են Արարատի, Կոտայքի և Շիրակի մարզերը։ 2016 թվականի ընթացքում ամենաքիչ թվով երեխաներ ծնվել են Սյունիքի և Տավուշի մարզերում։ Մնացած մարզերը միջանկյալ դիրքերում են։
Մահվան դեպքերը Հայաստանում ավելացել են։ Նախորդ տարվա ընթացքում մահերի թիվը 28 հազար 129-ն է։ Այս ցուցանիշը 2015թ-ի հանմեմատ աճել է 0.9 տոկոսով։ Մահվան պատճառների մեջ գերակշռում են արյան շրջանառության համակարգի հիվանդությունները. դրանք կազմել են մահվան դեպքերի 47.3 տոկոսը։
Ընդհանուր առմամբ, Հայաստանում ապրում է 2 միլիոն 986 հազար 500 մարդ։ 2015 թվականին Հայաստանում մշտական բնակություն ունեցողների թիվը 12 հազար 100-ով ավելի է 2016-ի համեմատ։
