ԵՐԵՎԱՆ, 21 հունվարի — Sputnik, Արմենուհի Մխոյան. Երեխաները լույս աշխարհ են եկել կեսարյան հատումով հունվարի 20-ին երեկոյան, Գյումրու Մոր և մանկան ավստրիական հիվանդանոցում, որտեղ հղիության ընթացքում հսկողության տակ է գտնվել մայրը՝ 30 ամյա Անի Բալյանը:
«Ժամանակից մի փոքր շուտ ծնված փոքրիկները դեռ մինչև ծնվելն էին իրենց բնավորությունը ցույց տալիս»,- անկեղծանում է մայրը:
Ավագը՝ Մարիանան, 2կգ 160 գրամ է ծնվել, երկրորդը՝ Արիանան, 1 կգ 690 գրամ քաշով է ծնվել և տղան՝ Արենը՝ 2կգ 45գ: Մոր և երեխաների վիճակը բժիշկները լավ են գնահատում, բայց առայժմ և՛ մայրը և՛ փոքրիկները մնալու են հիվանդանոցում ՝ բժիշկների հսկողության տակ:
Անին ուրախությունը հազիվ զսպելով նշեց, որ առաջին զգացողությունը ուրախությունն է եղել, ապա վախն ու շոկային վիճակը:«Երբ առաջին անգամ տեսա երեխաներին զգացմունքներս անասելի էր՝ ուրախություն, բայց նաև վախ: 6 տարի եմ իրենց սպասել»,-անկեղծանում է մասնագիտությամբ մանկավարժ-հոգեբան մայրը՝ նշելով որ իրենց տանն արդեն ամեն ինչ պատրաստ է փոքրիկների համար: «Ամեն մեկն իր անկողինն ու իր անկյուն ունի, հագուստը: Երկար ենք սպասել այս օրվան»,-նշեց եռյակի մայրը՝ փաստելով, որ ամուսինը զբաղվում է արտագնա աշխատանքով:
Այս լուրը Գյումրու համար ավետիս որակեց հիվանդանոցի գլխավոր բժիշկ Աշոտ Կուրղինյանը: «Մարզում եռյակը է ծնվել՝ սա իրոք ուրախալի է բոլորիս: Երեկ շատ բարեհաջող ծննդալուծում ունեցանք և Անի Բալյանը կեսարյան հատումով ունեցավ երեք առողջ բալիկ ունեցավ: Ոչ միայն ծնողներն են երկար սպասել այլ նաև մենք, քանի որ լինելով մեր հսկողության տակ, հիվանդանոցը կարողացավ ծանր պատասխանատվությունն իր վրա վերցնել և բարեհաջող ավարտել:
Սա ցույց է տալիս, որ բավարար հագեցվածություն կա և 3 երեխաներին էլ՝ անհրաժեշտության դեպքում ամբողջ ծավալի օգնություն ցույց տալու հնարավորություն կա»,- նշեց Աշոտ Կուրղինյանը:
Եռյակի հայրը՝ Արթուր Շուխյանը, առաջինը հիվանդանոցում կնոջը շնորհավորեց,ապա կնոջ ուղեկցությամբ վերակենդանացման բաժանմուքն գնաց՝ փոքրիկներին տեսնելու: Չնայած գյումրեցուն հատուկ զսպվածությանը, Արթուրը չէր կարող թաքցնել աչքերի ուրախություն ու հպարտությունը՝ 6 երկար տարի սպասելուց հետո Աստված նրանց երկու դուստր ու մեկ որդի պարգևեց:
