ԵՐԵՎԱՆ, 1 փետրվաի-Sputnik. Հունվար-դեկտեմբեր ամիսներին ուղևորաշրջանառությունը լուրջ թվեր է արձանագրել, հատկապես, եթե հաշվի առնենք բնակչության թվաքանակը։ Հայաստանից գնացել ու եկել են 5 միլիոն 782 հազար անգամ։
«Մուտքերի և ելքերի հաշվեկշիռը կազմել է մինուս 48 հազար 170։ Այսինքն` ավելի շատ սահմանահատումը դեպի ելք է եղել»,-ասաց Հայաստանի ազգային վիճակագրական ծառայության մարդահամարի եւ ժողովրդագրության բաժնի պետ Կարինե Կույումջյանը։
Կույումջյանը հորդորում է չշտապել խոսել արտագաղթի մասին, քանի որ թվերը կարող են խաբուսիկ լինել։ Օրինակ` ելքի վիզան 3 ամիս է, դեկտեմբերին մեկնածները կարող են և հետ վերադառնալ։ Իսկ նրանց ուսումնասիրությունը մինչև 2016 թվականի դեկտեմբերն է եղել։ Բացի այդ, ներկայացված թվերը կարող են երերուն լինել` կապված երկքաղաքացիության հետ։ Շատերը մի անձնագրով մտել են, մյուսով` դուրս եկել։
«Դրա համար մենք իրականացնում են հետազոտություն, որպեսզի հասկանանք` այդ ծավալից որքան մարդ կա, որ մինչև 3 ամիս ժամկետով են բացակայել։ Նրանք միգրանտների շարքին չեն դասվում»,-ասաց Կույումջյանը։
2016 թվականի երկրորդ կիսամյակում մեր երկրում ապաստան է հայցել 64 անձ, որից 34-ը Սիրիայի քաղաքացի է, իսկ 18.8 տոկոսը Իրաքի քաղաքացիներ են։ Նրա խոսքով` եղել են դեպքեր, երբ ապաստանի հայցը կարճվել է, իսկ 13 մարդու շնորհվել է փախստականի կարգավիճակ։
