ԵՐԵՎԱՆ, 31 հունվարի — Sputnik. Ադրբեջանցի դիվերսանտի դին անհրաժեշտ է հայկական կողմին հետաքննությունն ավարտելու համար, ասաց Հայաստանի արտգործնախարար Էդվարդ Նալբանդյանը։
«Հայաստանը երբեք դեմ չի եղել մահացածների մարմինները վերադարձնելուն, Աստրախանում Ադրբեջանի հետ նույնիսկ ձեռք է բերվել համաձայնություն, սակայն ցանկանում եմ հիշեցնել 2014թ-ի դեպքը, երբ ադրբեջանցիները կրակի տակ են պահել ուղղաթիռի կործանման վայրը, որտեղ գտնվել են խոցված ուղղաթիռի անձնակազմի անդամները»,- ասաց Նալբանդյանը։
Նրա խոսքով` հայկական կողմը ստիպված է եղել անցկացնել հայ զինծառայողների մարմինները վերադարձնելու գործողություն։
Նալբանդյանի կարծիքով` հիմա, երբ Ադրբեջանը խոսում է մարդասիրության մասին, հազիվ թե հիշում է այն մասին, թե ինչպես է ԻՊ-ի մեթոդներով տեսախցիկների առաջ հարցաքննում գերի ընկած հայ զինվորներին։
«Կամ մարդասպանին (Ռամիլ Սաֆարով` խմբ.) հռչակում են ազգային հերոս` կոչ անելով երիտասարդությանը հետևել նրա օրինակին»,- ասաց Նալբանդյանը։
Ադրբեջանը հրաժարվում է միջադեպերի հետաքննության մեխանիզմից, այդ պայմաններում Հայաստանը Ղարաբաղի հետ միասին ստիպված է ինքնուրույն անցկացնել անհրաժեշտ հետաքննություն, որը պետք չէր լինի վերոհիշյալ մեխանիզմի դեպքում։
«Տվյալ պահին համապատասխան գործողությունները դեռ չեն ավարտվել»,- ասաց Նալբանդյանը։
