ԵՐԵՎԱՆ, 8 հունվարի — Sputnik. ՀԱՊԿ-ը հստակ արտահայտել է իր դիրքորոշումն՝ Ադրբեջանի կողմից դիվերսիայի փորձ կատարելու վերաբերյալ, որը ձեռնարկվել էր 2016թ.-ի դեկտեմբերի վերջին, այսօր լրագրողներին ասել է ՀՀ պաշտպանության նախարար Վիգեն Սարգսյանը:
Դեկտեմբերի 29-ին, վաղ առավոտյան ՀՀ Տավուշի մարզի Չինարի գյուղից դեպի հարավ արևելք ընկած պետական սահմանի հատվածում, ադրբեջանական զինուժը ձեռնարկել էր դիվերսիոն ներթափանցման փորձ։ Ադրբեջանական կողմը կրակ է բացել դիպուկահարների հրացաններից և նռնականետերից:
«ՀԱՊԿ երկրները Երևանում տեղի ունեցած գագաթաժողովում ընդունած հայտարարության միջոցով գնահատական տվել են ԼՂՀ կարգավորման հարցին: Ինչ վերաբերում է Տավուշում դիվերսիայի առիթով ՀԱՊԿ քարտուղարության հայտարարությանը, ապա այն հստակ է եղել», — ասել է Սարգսյանը:
Դեկտեմբերի 29-ին, իր հայտարարությունում ՀԱՊԿ նախկին գլխավոր քարտուղար Նիկոլայ Բորդյուժան հայ-ադրբեջանական սահմանին տեղի ունեցած իրադարձություններն անվանել է սադրանք՝ կազմակերպության անդամ երկրի նկատմամբ:
Վիգեն Սարգսյանի խոսքով՝ տոնական օերերին իրավիճակը համեմատաբար հանգիստ է եղել, սակայն դա չի նշանակում, որ հրադադարի խախտումներ չեն եղել, քանի որ հակառակորդը պարբերաբար անկանոն կրակում է:
«Մեր զորքերը պատասխանում են միայն նշանառությամբ կատարվող կրակոցներին, երբ անհրաժեշտություն կա պատասխան կրակ բացելու», — ասել է նախարարը՝ նշելով, որ հայկական կողմը խուսափում է իրավիճակի թեժացումից:
Միաժամանակ նա հավելել է, որ հրադադարի ցանկացած խախտում պայմանավորվածությունների խախտում է, և այն պետք է համապատասխան գնահատական ստանա:
ՀՀ պետական սահմանի պաշտպանության համար մղված մարտերի ընթացքում զոհվել են ավագ լեյտենանտ Շավարշ Մելիքսեթի Մելիքյանը, շարքայիններ Էդգար Գրիգորի Նարայանը և Էրիկ Գարիկի Աբովյանը։
Նյութի ռուսերեն տարբերակը
