ԵՐԵՎԱՆ, 30 հունվարի — Sputnik. Հայաստանի տնտեսությունը 2017թ-ին կաճի 2,9 տոկոսով, ասվում է Եվրասիական զարգացման բանկի «Մակրոտնտեսություն 2017»-ում։ Ներքին պահանջարկի վերականգնման և խթանող ծրագրերի իրագործմանը զուգահեռ` տնտեսական աճի տեմպերը 2017թ-ին կավելանան մինչև 2,9 տոկոս, իսկ 2018թ-ին` 3,9 տոկոս, ասվում է զեկույցում։
2016թ-ի տվյալներով` ՀՆԱ աճը կկազմի 0,6 տոկոս, ինչը ցածր է անցած կանխատեսումից և առաջին հերթին կապված է գյուղատնտեսական համախառն արտադրանքի ծավալների անկման հետ։
2017-2018թթ-ին ներքին պահանջարկի ավելացումը և ներկրվող հումքի ու ապրանքների գների աճը կնպաստեն գնաճային գործընթացների հետագա վերականգնմանը։ Միաժամանակ, 2017թ-ին գների մակարդակի վերականգնման վրա զսպող ազդեցություն կունենա գազի և էլեկտրաէներգիայի սակագների նախատեսվող նվազեցումը։ Սպասվում է, որ 2017թ-ին և 2018թ-ին, նոր շոկերի պարագայում, գնաճը կկազմի համապատասխանաբար 1,8 տոկոս և 2,8 տոկոս։
2016թ-ին, տնտեսական աճի հետ կապված, իրավիճակը 2015թ-ի համեմատ փոխվել է դեպի լավը։ Տարվա արդյունքներով` ԵԶԲ երկրներում տնտեսական անկումը 2015թ-ի 3,1 տոկոսից դանդաղել է մինչև 2016 թ-ի 0,5 տոկոս, սակայն տնտեսական դինամիկայի վատթարացում նկատվել է ԵԶԲ վեց երկրներից երկուսում` Հայաստանում և Ղազախստանում։
