Այս հանրաճանաչ հավելվածը ստեղծվել է մի նպատակով` սեփական կյանքի հետաքրքիր դրվագները լուսանկարների ու տեսանյութերի միջոցով ներկայացնել ընկերներին ու մյուս օգտատերերին։
Հայաստանի բնակիչների համար Instagram-ը տևական ժամանակ «անընդունելի» հարթակ էր, և շատ քչերն էին էջեր բացում այնտեղ։ Մտածում էին` իմաստ չկա նոր էջ բացելու, քանի որ այսպես թե այնպես չեն լուսանկարվում, որովհետև ֆոտոգենիկ չեն։
Սակայն այս սոցցանցում օրեցօր ավելանում է հայ օգտատերերի թիվը։ Օրինակ` հունվարին, պաշտոնական տվյալների համաձայն, Հայաստանում Instagram-ից օգտվել է 310 000 ակտիվ օգտատեր։
Այս սոցցանցի տիրույթում հայ օգտատերերից շատերը կարողանում են ճիշտ օգտագործել իրենց էջերը` լուսանկարվելով գեղեցիկ բնապատկերների ֆոնին կամ հետաքրքիր միջոցառումների ժամանակ, հրապարակելով իրենց հարազատների լուսանկարները կամ ուղևորությունների ժամանակ արված տեսանյութերն ու լուսանկարները, կամ պարզապես գեղեցիկ առարկաներ են ցուցադրում` առանց որևէ մեկի ծիծաղը հարուցելու։
Սակայն կան նաև աստղային հիվանդությամբ տառապող կամ պարզապես Քիմ Քարդաշյանին, Քայլիին և Քենդել Ջեներին կրկնօրինակող աղջիկներ, որոնք ուզում են ամեն կերպ ապացուցել, որ իրենք են հասարակության սերուցքը և ապրում են շատ շքեղ կյանքով։ Նրանք սովորաբար սելֆի են անում թանկարժեք խմիչքի գավաթը բռնած, ընդ որում` այնպիսի դիրքով, որ հայելու մեջ անպայման երևա Iphone-ը։
Չմոռանանք նաև վառ կարմիր վարդերի փնջի մասին։ Չէ՞ որ երկրպագուն մեծ ջանքեր է գործադրել, ինչպե՞ս չպարծենաս այդ փաստով։
Սակայն, եթե դուք չունեք ձեր բարեմասնությունները ցուցադրող զուգագուլպաներով կամ «գիալուրոնային թթվի համը տեսած» շուրթերն ի ցույց դնող լուսանկար, ապա դուք Instagram-ի գլամուր օգտատեր համարվել չեք կարող։
Մեր հայրենակիցների մի մասն էլ փորձում է բլոգերի կարիերա սկսել Instagram-ի տիրույթում։ Ոմանք դիմահարդարի լավ հմտություններ ունեն, ոմանք էլ լավ երգում են կամ պարում ու տեսանյութեր հրապարակում։
Եվ եթե ձեր բախտը բերի, դուք կարող եք ոչ միայն ուշադրություն գրավել ու «լայք» հավաքել, այլև լավ կոմերցիոն առաջարկ ստանալ։
Իսկ վերջին ժամանակաշրջանում տարածում են ստացել նաև երիտասարդ մայրիկների էջերը, որոնք անհավանական քանակի հեշթեգեր են դնում, հրապարակում են իրենց երեխաների լուսանկարները, գրում են, թե երեխան որտեղ է գտնվում, ինչ է անում։ Սովորաբար նրանց չի էլ հուզում, որ լուսանկարները միայն իրենց են հաճույք պատճառում։ Ի դեպ, այդ մայրիկները (երբեմն նաև հայրիկները) նույնիսկ չեն էլ մտածում, որ երեխայի մասին այդքան շատ տեղեկություններ հրապարակելով` վտանգում են իրենց փոքրիկին։
Չմոռանանք նաև «գյուղական գլամուրի» մասին, այսինքն` լուսանկարներ` ոչնչի մասին, որոնք կարելի վերնագրել այսպես. «Պատին կախված գորգի ֆոնին», «Ես և Ժիգուլին», «Ես և սպիտակ Նիվան», «Ես և նստարանը», «Ես հաց եմ գնել, ամբողջ աշխարհը թող իմանա այդ մասին»։
Մի խոսքով, հայերը, նորաձևության վերջին միտումներին հետևելով, միացել են Instagram-ի խրախճանքին։ Մինչդեռ այդ սոցցանցի գլխավոր նպատակը իմաստ պարունակող լուսանկարներ հրապարակելն է։
