ԵՐԵՎԱՆ, 25 հունվարի — Sputnik. Ի պաշտպանություն Արցախ այցելած բլոգեր Ալեքսանդր Լապշինի Փաստաբանների պալատում ստեղծված աշխատանքային խումբն այս պահին աշխատում է, ուսումնասիրում է միջազգային փաստաթղթերը:
«Փորձում ենք հասկանալ, թե ինչ կարող ենք անել, ՄԱԿ-ի շրջանակում որ կառույցին կարող ենք դիմել»,- ասաց Զոհրաբյանը:
Աշխատանքային խումբը դիմել է նաև Եվրոպական փաստաբանների պալատների միությանը, որպեսզի այս կառույցը ևս անդրադառնա Լապշինի խնդրին:
«Փորձում ենք դատապարտող հայտարարություններ ստանալ փաստաբանական համայնքներից»,- ասաց Զոհրաբյանը:
Նա նաև չբացառեց, որ ի պաշտպանություն Լապշինի և ընդդեմ Ադրբեջանի քաղաքականության, Հայաստանում ստորագրահավաք կնախաձեռնվի:
Ի դեպ, նման ստորագրահավաք արդեն իրականացվում է ռուսաստանյան սոցկայքերում: Նախաձեռնության հեղինակները հավաքված ստորագրություններով նամակ են պատրաստվում ուղարկել միջազգային կառույցներին:
Հիշեցնենք` ՌԴ և Իսրայելի քաղաքացի Ալեքսանդր Լապշինը, որը բնակվում է Մոսկվայում և վարում է հեղինակավոր Travel Blog-ը, ձերբակալվել էր 2016 թվականի դեկտեմբերի 15-ին Մինսկում: 2011 թվականի ապրիլին, 2012 թվականի հոկտեմբերին և 2016 թվականի հունիսին Լապշինն այցելել էր Լեռնային Ղարաբաղ և այդ մասին գրել իր բլոգում՝ քննադատելով Ադրբեջանի քաղաքականությունը, ինչի համար Ադրբեջանի իշխանությունները նրա նկատմամբ քրեական գործ էին հարուցել և հետախուզում հայտարարել՝ Ադրբեջանի պետական սահմանն անօրինական հատելու մեղադրանքով: Ադրբեջանը դիմել է Բելառուսին՝ Լապշինին արտահանձնելու պահանջով:
Հունվարի 20-ին Բելառուսի գլխավոր դատախազի տեղակալ Ալեքսեյ Ստուկը Ադրբեջանի պահանջը բավարարելու որոշում է կայացրել։
