ԵՐԵՎԱՆ, 25 հունվարի — Sputnik. Երևանի քաղաքապետարանը փորձում է իր ենթակայության տակ գտնվող բոլոր բուժհաստատություններն ապահովել ժամանակակից սարքավորումներով, ինչը կարող է բարձրացնել բուժսպասարկման որակը, լրագրողներին ասաց Երևանի փոխքաղաքապետ Դավիթ Օհանյանը։
Օհանյանի խոսքով` քաղաքապետարանի ենթակայության տակ գտնվում է 31 բժշկական կենտրոն։
«Այս տարի դրանք կլինեն 30-ը, քանի որ մենք միավորել ենք «Սուրբ Աստվածածին» ծննդատունը համանուն բժշկական կենտրոնի հետ»,- ասաց փոխքաղաքապետը։
Օհանյանը հավելեց, որ այդ կերպ լուծվել են ֆինանսական խնդիրները, ինչպես նաև որակյալ բժշկական ծառայություններ տրամադրելու հետ կապված հարցերը։
Առողջության պահպանման առաջնային օղակ հանդիսացող 22 պոլիկլինիկայի հիվանդությունների վաղ շրջանում ախտորոշման և բուժման համար 2013-2016 թվականներին համայնքային բյուջեի միջոցներով 143 սարքավորում է տրամադրվել, ինչը նաև պոլիկլինիկաների սեփական եկամուտների ապահովման խթան է հանդիսացել: Դրա շնորհիվ 2 տոկոսով աճել է նաև առաջնային օղակի բուժհաստատություններում գրանցված քաղաքացիների թիվը:
Օհանյանն ասաց, որ մի քանի տարի առաջ մայրաքաղաքի ոչ բոլոր պոլիկլինիկաներն էին ջեռուցվում։
«Այսօր մայրաքաղաքում Երևանի քաղաքապետարանի ենթակայության բոլոր բուժհաստատությունները ջեռուցվում են, ինչը մեր ամենամեծ ձեռքբերումներից մեկն է: Գրեթե 50 տոկոսով էլ ապահովել ենք նոր պատուհանների տեղադրումը, որի ուղղությամբ աշխատանքները կավարտենք 2017 թվականին»,- նշեց Դավիթ Օհանյանը:
Քաղաքապետարանի տվյալներով` 2016թ-ին մայրաքաղաքի բուժհաստատություններում նոր պատուհաններ տեղադրելու համար հատկացվել է 2 միլիոն 460 հազար դրամ։
«2017թ —ին մենք կշարունակենք հին պատուհանները փոխարինել նորերով, ինչպես նաև տարբեր ծրագրեր կիրականացնենք Երևանի քաղաքացիների բժշկական սպասարկման որակը բարձրացնելու համար։ Բայց վերանորոգումը, ջեռուցման համակարգի տեղադրումն անիմաստ է, եթե հիվանդանոցներում և պոլիկլինիկաներում չլինեն որակյալ աշխատողներ։ Մենք աշխատում ենք այդ ուղղությամբ. 185 բժիշկ և 155 բուժքույր ուղարկվել են վերապատրաստման»,- ասաց Օհանյանը։
Նրա խոսքով` բոլորին հայտնի է, որ Երևանը սերտորեն համագործակցում է աշխարհի 50 քաղաքի, մասնավորապես, Մարսելի և Սանկտ Պետերբուրգի հետ` համատեղ իրականացնելով տարբեր նախագծեր։
Օհանյանը հաղորդեց նաև, որ 2016թ-ին Երևանում ծնվել է 22 906 երեխա` 12 039 տղա և 10 867 աղջիկ։ 2015թ-ին լույս աշխարհ է եկել 22 966 երեխա` 12 061 տղա և 10 905 աղջիկ։ 2016թ-ին Երևանի քաղաքապետարանին կից 22 բուժհաստատություններ է այցելել 1 միլիոն 794 354 քաղաքացի, 2015թ-ին` 1 միլիոն 962 246։
