ԵՐԵՎԱՆ, 25 հունվարի — Sputnik. Այս տարի Վերնիսաժն ավելի նորովի և բարեկարգ կդառնա Հայաստանի բնակիչների և զբոսաշրջիկների համար, լրագրողներին հայտնեց Երևանի փոխքաղաքապետ Դավիթ Օհանյանը։ Նրա խոսքով` Վերնիսաժի բարեկարգման աշխատանքների իրագործման վրա ծախսվել է 110 միլիոն դրամ։ Տարածքի վերանորոգման նախագծի էսքիզները քննարկելուց հետո մասնագետներն անցել են գործի, հայտնել է Օհանյանը։
«Մենք հիմնականում մաքրել ենք Արամի և Բյուզանդի փողոցները, որոնք ծանրաբեռնված էին վաճառակաների ապրանքներով։ Այնտեղ վաճառվում էին հին իրեր, և մենք կարողացել ենք հարմարավետ պայմաններ ստեղծել վաճառականների համար, այլ ոչ թե զրկել նրանց վաստակից»,- ասաց Օհանյանը։
Նրա խոսքով` Վերնիսաժը գործում է արդեն 20 տարի, և այնտեղ միշտ եռուզեռ է եղել, վաճառում են ոչ միայն զարդեր, այլ նաև օգտագործած իրեր, ընտանի կենդանիներ։
«Վերնիսաժում վաճառվող կենդանիները մենք տեղափոխել ենք Զեյթունի շուկա, իսկ Բուզանդի փողոցում օգտագործված հագուստ վաճառողներին` Հրազդան տոնավաճառ»,- ասաց նա։
Փոխքաղաքապետը հաղորդեց նաև, որ հաստատվել է Վերնիսաժի տարածքում ապրանք վաճառելու կանոնակարգը և կազմվել է ապրանք ցանկ, թե ինչ կարելի է վաճառել այնտեղ։
Քաղաքապետարանի տվյալներով` այս տարի երևանցիները և հյուրերը հնարավորություն կունենան ոչ միայն զբոսնել Վերնիսաժում, այլ նաև այգում և վայելել շատրվանների ձայնը։
