ԵՐԵՎԱՆ, 25 հունվարի — Sputnik. ԵԽԽՎ-ում Ուկրաինայի պատվիրակ Վոլոդիմիր Արիևը հեղինակել է «Լրագրողների նկատմամբ հարձակումներն ու մամուլի ազատությունը Եվրոպայում» զեկույցը, որում նշված է, թե Ղարաբաղը Ադրբեջանի մաս է, և այնտեղ բացակայում է խոսքի ազատությունը: ԵԽԽՎ-ում Հայաստանի պատվիրակ Սամվել Ֆարմանյանն անդրադարձել է այս զեկույցին:
Ֆարմանյանը նշել է, որ չի խոսելու Հայաստանի մասին, քանի որ, բարեբախտաբար, զեկույցում Հայաստանին հղում չկա, և Հայաստանը մամուլի ազատության լավ ցուցանիշ ունի։ Նրան զարմացրել է այն փաստը, որ զեկույցում հղում է արվում Ղարաբաղին, և այդ հղումն անվանել է մանիպուլյատիվ:
«Պարոն Արիևը մամուլի ազատության զեկույցում նշում է, որ Լեռնային Ղարաբաղը Ադրբեջանի մաս է և այն ոչ թափանցիկ ու անօրեն տարածք է։ Պարզ հարց է առաջանում ինչո՞ւ է այս հղումն այնտեղ. քանի որ Ադրբեջանի կառավարությանն անհրաժեշտ է այն։ Կարծո՞ւմ եք, թե այս հղումն արվել է, քանի որ Ադրբեջանի կառավարությունը մտահոգված է մամուլի ազատությամբ։ Երբե՛ք։ Նրանք անհանգստանում են ավելի շատ Լեռնային Ղարաբաղում մամուլի ազատության մասին, բայց ոչ Ադրբեջանում։ Բոլորս լավ գիտենք, թե ինչ է կատարվում Ադրբեջանում։ Սա իսկապես ծիծաղելի է»,- ասել է Ֆարմանյանը։
Արիևն իր զեկույցում անդրադառնում է հակամարտության գոտիներում մամուլի ազատության հարցերին ու նշում․ «ԵԽԽՎ-ն խոր մտահոգությամբ նշում է, որ Մարդու իրավունքների եվրոպական կոնվենցիայի 10-րդ հոդվածով նախատեսված լրատվամիջոցների ազատությունը բացակայում է նաև անդամ երկրների այն տարածքներում, որոնք դե-ֆակտո վերահսկվում են անջատողական ռեժիմների կողմից՝ մասնավորապես Ադրբեջանում՝ Լեռնային Ղարաբաղում, Վրաստանում՝ Աբխազիայում ու Հարավային Օսեթիայում, Մոլդովայում՝ Մերձդնեստրում»։
«Եվս մեկ հարց է առաջանում․ ինչու է պարոն Արիևը գրել այս ձևակերպումն այստեղ։ Դժբախտաբար, ոչ այն պատճառով, որ պարոն Արիևն այցելել է Ղարաբաղ կամ կատարել փաստահավաք այց, նա անգամ չի օգտագործել «Freedom House»-ի զեկույցը, որտեղ Ղարաբաղն ավելի լավ ցուցիչ ունի, քան Ադրբեջանը, այլ քանի որ, ինչպես մենք տեսնում ենք նրա՝ ադրբեջանական մամուլին տված հարցազրույցում, որտեղ նա ներողություն է խնդրում Իլհամ Ալիևից, ասում է նաև, որ իր տատիկն ադրբեջանցի է։ Սա նրա խոսքերն են։ Վերջապես, մենք պետք է հիշենք, որ մենք մարտադաշտում չենք, մենք պատանդներ չենք, ու ես գիտեմ, թե Դուք որքան եք հոգնել հայ-ադրբեջանական կռիվներից»,-ասաց Սամվել Ֆարմանյանը՝ կոչ անելով աջակցել ներկայացված փոփոխություններին։
«Եկեք հստակ ուղերձ հղենք նախագահ Ալիևին, որ նա պետք է գտնի շուկաներ առևտրի համար, Ստրասբուրգի փոխարեն»,-խոսքը եզրափակեց Սամվել Ֆարմանյանը։
Նշենք, որ զեկույցի նշված դրույթի հետ կապված 3 փոփոխություն է ներկայացվել, որոնցով առաջարկվում է վերոնշյալ անունները փոխարինել «հակամարտության գոտիներով»:
