«Ժողովուրդ». Հովիկ Աբրահամյանին կհետևեն այլ ՀՀԿ-ականներ
Օրաթերթն անդրադարձել է ԱԺ նախկին նախագահ, ՀՀ նախկին վարչապետ, ՀՀԿ փոխնախագահ Հովիկ Աբրահամյանի՝ հարազատ կուսակցությունից հեռանալու որոշմանը: Թերթը նշում է, որ թեև Աբրահամյանը իր որոշումը դեռ չի մեկնաբանել` խոստանալով պարզաբանումներ տալ այսօր, բայց կատարվածն, ըստ հոդվածագրի, սպասելի էր:
Քանի որ վերջին տարիներին իշխանության ներսում գնալով խորացել էին հակասությունները, և Սերժ Սարգսյան-Հովիկ Աբրահամյան հարաբերությունները որքան էլ արտաքուստ բարեհամբույր էին, ներքուստ միմյանց նկատմամբ անվստահություն կար: Եվ, վերջապես, Աբրահամյանը դարձավ քավության նոխազ. խորհրդարանական ընտրություններին ընդառաջ հասարակական դժգոհությունները մեղմելու նպատակով նա պարտադրված անակնկալ հրաժարական ներկայացրեց և ըստ շրջանառվող խոսակցությունների՝ ՀՀԿ-ում մնալու դեպքում չէր լինելու այդ կուսակցության համամասնական ընտրացուցակում»,-գրում է թերթը:
«Ժողովուրդ»-ը նաև հայտնում է, որ իր տեղեկություններով, առաջիկա օրերին ՀՀԿ-ն լքելու մասին կհայտարարեն մի շարք այլ կարկառուն դեմքեր ևս` ուղևորվելով դեպի «Ծառուկյան» դաշինք»:
«Փաստ». Սուրիկ Խաչատրյանը տեղ է փնտրում Ծառուկյանի ցուցակում
«Փաստ» թերթի տեղեկություններով` Սյունիքի նախկին մարզպետ Սուրիկ Խաչատրյանը, չնայած հայտարարել է, որ հեռացել է քաղաքականությունից, բայց հիմա էլ փորձում է ստանալ Գագիկ Ծառուկյանի «դաբրոն» և հայտնվել նրա դաշինքի ընտրական ցուցակում:
«Եթե հանկարծ իր խնդիրն անլուծելի լինի, Լիսկան փորձելու է իր թեկնածուին խցկել այդ ցուցակի մեջ: Մեր տեղեկություններով` նա Ծառուկյանից դրական արձագանք չի ստացել: Սակայն Խաչատրյանը չի հուսահատվում և համառորեն շարունակում է գործել իր նպատակին հասնելու համար»,- գրում է թերթը:
«Հրապարակ». ԲՀԿ-ում դժգոհ են Իշխան Զաքարյանից
Թերթի տեղեկություններով` ԲՀԿ-ում դժգոհություն է հասունանում Իշխան Զաքարյանի դեմ, ով իր ձեռքն է վերցրել նախընտրական ողջ գործընթացի կառավարումը և «շարք է կանգնեցնում» հներին։
«Մասնավորապես, վերջիններիս ասվել է, որ ռեյտինգայինով առաջադրվողներն առնվազն 10-15 հազար ձայն պետք է հավաքեն։ Այս հողի վրա տհաճ զրույց է եղել Վարդան Վարդանյանի հետ, որը հակադրվել է՝ ասելով, որ այդ թիվը ռեյտինգային ընտրակարգի դեպքում խիստ անիրատեսական է, բայց գտնվել են նաև համաձայնողներ, օրինակ՝ Արշակ Մխիթարյանը՝ Բռլյանտի Արշակը, էջմիածինցի Հրանտ Մադաթյանը և ուրիշներ։ Սակայն այս նշաձողը քչերը կարող են հաղթահարել»,-գրում է «Հրապարակ»-ը։
«Հայկական ժամանակ». Պաշտոնական այց՝ 10 տարի անց
Թերթն անդրադարձել է ՀՀ վարչապետ Կարեն Կարապետյանի մոսկովյան պաշտոնական այցին՝ արձանագրելով, որ ՀՀ որևէ վարչապետ պաշտոնական այցով ՌԴ չի մեկնել արդեն մոտ 10 տարի:
«Վերջին անգամ ՀՀ վարչապետի պաշտոնում Մոսկվա մեկնած անձը եղել է Սերժ Սարգսյանը` 2007 թվականի սեպտեմբերի 25-ին: Իսկ այն բանից հետո, երբ Սերժ Սարգսյանը ստանձնեց ՀՀ նախագահի պաշտոնը, ՀՀ որևէ վարչապետ պաշտոնական այցով Մոսկվա չի մեկնել: Ու դա կարծես տաբու էր: Այդ պատվին չարժանացավ ոչ Տիգրան Սարգսյանը, որն անձնական շատ ջերմ հարաբերություններ ուներ թե Պուտինի, և թե Մեդվեդևի հետ, և ոչ էլ Հովիկ Աբրահամյանը: Կարեն Կարապետյանը փաստորեն կոտրեց այդ տաբուն:
Քաղաքականության մեջ պատահականություններ չեն լինում և սա էլ, իհարկե, պատահականություն չէ: Իր ենթակայությամբ որևէ վարչապետի պաշտոնական այցով Մոսկվա «չուղարկելով»՝ Սերժ Սարգսյանը արձանագրում էր, որ Ռուսաստանի հետ հարաբերություններում ինքն է միայնակ «որոշողը»,- գրում է թերթը և եզրակացնում, որ Կարեն Կարապետյանի պաշտոնական այցով իրավիճակը փոխվում է: Սրանով ըստ թերթի՝ «ռուսական կողմն արձանագրում է, որ Հայաստանի հետ հարաբերություններում առաջնային դերն այլևս վերապահվում է Կարեն Կարապետյանին»:
«Իրավունք». Հին խավիար՝ նոր փաթեթավորմամբ
«Իրավունք» թերթն անդրադարձել է ԵԽԽՎ-ում երեկ մերժված հայկական պատվիրակության երեք առաջարկները վերանայելու մասին ուկրաինացի պատվիրակի առաջարկին: Այդ թվում՝ ծագումով ադրբեջանցի Վոլոդիմիր Արիևի հեղինակած «Լրագրողների նկատմամբ հարձակումներն ու մամուլի ազատությունը Եվրոպայում» զեկույցի 9-րդ կետը:
Զեկույցում ԼՂ-ն հիշատակվում է որպես Ադրբեջանի տարածք` վերահսկվող անջատողական ռեժիմի կողմից: «Սա թերևս, ԵԽԽՎ-ում ամենևին էլ նորություն չէ, որովհետև առաջին անգամ չէ, որ ադրբեջանամետ պատվիրակները առիթը բաց չեն թողնում, որպեսզի որտեղ հնարավոր է հակահայկական նման թեզեր ամրագրեն տարբեր փաստաթղթերում»,- գրում է թերթը:
Եվ, այդուհանդերձ, «հանուն արդարության պետք է նշենք, որ հայկական պատվիրակությունը մինչև վերջ պայքարեց զեկույցի ականները չեզոքացնելու ուղղությամբ, սակայն այն ավարտվեց արդեն ավանդական դարձած հայ և ադրբեջանամետ պատվիրակների առճակատմամբ, բայց ոչ մեզ համար նպաստավոր տարբերակով»,- եզրակացնում է «Իրավունք»-ը:
