ԵՐԵՎԱՆ, 21 հունվարի — Sputnik. Բելառուսի իրավապահ մարմինների կողմից Ադրբեջանի պահանջով ձերբակալված բլոգեր Ալեքսանդր Լապշինն Ադրբեջանի նախագահ Իլհամ Ալիևից ներողություն խնդրել է, բայց ոչ՝ ԼՂՀ այցելելու համար։ Այդ մասին Sputnik Արմենիային հայտնեց ՀՀ փաստաբանների պալատում ի պաշտպանություն Լապշինի ստեղծված աշխատանքային խմբի ղեկավար, փաստաբան Արա Ղազարյանը։
«Նա, իրոք, դիմել է Ալիևին, ներողություն է խնդրել նրանից, բայց միայն՝ անձնական վիրավորանք հասցնելու համար։ Լեռնային Ղարաբաղի ու Հայաստանի մասին այդ նամակում խոսք չկա»,- ասաց Արա Ղազարյանը։
Հիշեցնենք, Բելառուսում Իսրայելի հյուպատոս Յուլյա Ռաչինսկին հայտնել էր, որ Լապշինն իր ներկայությամբ ստորագրել է «Ադրբեջանի նախագահին ուղղված նամակը, որում ներողություն է խնդրում իր գործողությունների համար»։
ՌԴ և Իսրայելի քաղաքացի Ալեքսանդր Լապշինը, որը բնակվում է Մոսկվայում և վարում է հեղինակավոր Travel Blog-ը, ձերբակալվել էր 2016 թվականի դեկտեմբերի 15-ին Մինսկում:
2011 թվականի ապրիլին, 2012 թվականի հոկտեմբերին և 2016 թվականի հունիսին Լապշինն այցելել էր Լեռնային Ղարաբաղ և այդ մասին գրել իր բլոգում՝ քննադատելով Ադրբեջանի քաղաքականությունը, ինչի համար Ադրբեջանի իշխանությունները նրա նկատմամբ քրեական գործ էին հարուցել և հետախուզում հայտարարել՝ Ադրբեջանի պետական սահմանն անօրինական հատելու մեղադրանքով: Ադրբեջանը դիմել է Բելառուսին՝ Լապշինին արտահանձնելու պահանջով:
