Արմենուհի Մխոյան, Sputnik.
Շիրակի մարզպետ Հովսեփ Սիմոնյանը, անձամբ օգտվելով ռուսական «Պոբեդա» ավիաընկերության կանոնավոր չվերթերից, խորհուրդ է տալիս վստահել ավիաընկերությանը: Հունվարի 18-ից 21-ը Ուլյանովսկ կատարած ճանաչողական այցից հետո մարզպետը միտումնավոր օգտվել է այդ ընկերության չվերթից՝ ընկերության սպասարկման ու մատուցած ծառայություններին անձամբ ծանոթանալու համար:
Ու թեև մարզպետն ամենաէժան՝ 7500 դրամանոց տոմսով չի վերադարձել հայրենի մարզ, սակայն հասցրել է չվերթի մասին սեփական կարծիք կազմել:
«Միանգամից ասեմ` իմն այդ 7500 դրամանոց տոմսը չէր, ճիշտ էլ չէր լինի, եթե այդ գնանոց տոմս վերցնեի: Ես հնարավորություններ ունեմ, աշխատավարձս թույլ է տալիս, վերջապես մարզպետ եմ: Չվերթը Երևանից եղավ, բայց ուզում էի անպայման «Պոբեդայից» օգտվել, քանի որ շատ կարևորություն է տրվում այդ չվերթին, մենք ինքներս տուրիզմի զարգացման հետ կապված բավական հույսեր ունենք»,- ասաց նա:
Խոսելով ընկերության սպասարկման վերաբերյալ հակասական կարծիքների մասին՝ մարզպետը նշեց, որ սպասարկումը բավական նորմալ էր: Ընկերությունը լրացուցիչ գումարներ վաստակում է բեռների հաշվին. ցածր բյուջետային ավիաընկերությունները, այդ թվում նաև «Պոբեդան» այդ քաղաքականությունն են վարում, և հիմնական դժգոհությունը հենց այդ ուղեբեռի հետ էր կապված:
«Շատ կարևորություն տալով չվերթին, հաշվի առնելով մարզում տուրիզմի զարգացման հետ մեր ունեցած հույսերը` պետք էր անձամբ համոզվել ընկերության մատուցած ծառայության հարցում: Սա նաև լուրջ ներդրումների հնարավորություն է տալիս քաղաքին ու մարզին: Ցանկացած ընկերություն գնային առումով ունի իր տնտեսավարումը, և քաղաքացին ինքն է որոշում` որ գնային առաջարկն է իրեն բավարարում: Ժամային և սպասարկման առումով, ինչպես նաև ամենակարևորը՝ ինքնաթիռի վայրէջքի հետ կապված հարցերում ես գոհ եմ»,-նշեց մարզպետը փաստելով, որ «Բոինգի» չվերթից օգտվում էին ինչպես մարզի, այնպես էլ հանրապետության այլ տարածքների և ՌԴ-ից բնակիչները:
Թռիչքի ծանրաբեռնվածությունը գրեթե միշտ 100 տոկոս է:
«Եթե այսպես գնա, «Պոբեդան» հաղթանակ կլինի մարզի համար: Եթե կարողանաք այս ամբողջ տեմպը պահել, բավական դրական տեղաշարժ կլինի մարզի համար: «Շիրակ» օդանավակայանում ևս որոշակի դրական տեղաշարժ կա»,- փաստեց Շիրակի մարզպետ Հովսեփ Սիմոնյանը:
Ավելի քան 8 ամիս տևած դադարից հետո Գյումրու օդանավակայանից դեկտեմբերի 15-ից «Բոինգ» 737-800 ինքնաթիռով Մոսկվա-Գյումրի —Մոսկվա չվերթով տրվեց ռուսական «Պոբեդա» ավիաընկերության կանոնավոր չվերթերի մեկնարկը: Թռիչքներն իրականացվում են շաբաթական 3 անգամ՝ երեքշաբթի, հինգշաբթի և կիրակի օրերին:
