ԵՐԵՎԱՆ, 21 հունվարի-Sputnik, Գոհար Սարգսյան. Երեկ առավոտից լուրեր տարածվեցին, որ «ՍԱՍ» սուպերմարկետների ցանցի 2 մասնաճյուղ հաճախորդներին չի սպասարկում: Ներսում աշխատակիցներն էին, իսկ դռները՝ փակ: Նման իրավիճակի բախվել էին Թումանյան ու Բաղրամյան փողոցներում տեղակայված սուպերմարկետների ցանցի մասնաճյուղերի այցելուները:
Անմիջապես հասկանալի դարձավ, որ դա վարչապետ Կարեն Կարապետյանի հանձնարարականի տրամաբանական շարունակություն է: «ՍԱՍ»-ի կայքը երեկ չէր աշխատում, իսկ այսօր այն արդեն վերականգնվել է: Բնականոն հունի են վերադարձել նաև ժամանակավորապես չսպասարկած մասնաճյուղերը:
Ի պատասխան Հանրային հեռուստաընկերության հարցմանը, ՊԵԿ-ը պատասխանել է՝ պետեկամուտների կոմիտեն օերնսդրությամբ վերապահված լիազորությունների շրջանակում իր գործառույթն է իրականացնում:
Դեռևս հունվարի 19-ին Sputnik Արմենիան «Հարկատուները վարչապետի հանձնարարականը լուրջ չեն ընդունել» վերնագրով հոդված թողարկեց:
Կառավարության հերթական նիստի ժամանակ գործադիրի ղեկավարն ահազանգեց. շուկայում առկա են բացասական երևույթներ` իրացման շրջանառությունների և գների, աշխատողների թվաքանակի և վարձատրության չափի թերհայտարարագրում, առանց հաշվարկային փաստաթղթերի ապրանքների մատակարարում, ծախսերի ուռճացում, ՀԴՄ կտրոնների շահագործման կանոնների խախտում:
Վարչապետը ՊԵԿ ղեկավար Վարդան Հարությունյանին հանձնարարեց կիրառել օրենսդրությամբ նախատեսված գործիքակազմը:
Նա նման հանձնարարական տվել էր դեռևս 2016 թվականի սեպտեմբերի 15-ին: Ինչպես վարչապետը մեկնաբանեց՝ հարկատուները ոչ համարժեք են ընկալել իր հանձնարարականը:
Հասկանալի է, որ ստուգումներրը միայն մի սուպերմարկետների ցանցով չեն սահմանափակվի: Բայց գուցե այս դեպքից հետո դասեր քաղող հարկատուներ գտնվեն, հատկապես, որ Կարապետյանի կիրառած մեխանիզմները ոչ միայն պատժիչ բնույթ են կրում, այլև խրախուսող: Օրինակ՝ այն հարկատուները, որոնք կամովի կուղղեն թույլ տված խախտումները, չեն ներառվի տարեկան ստուգումների ծրագրում:
