ԵՐԵՎԱՆ, 19 հունվարի — Sputnik. ՀՀ վարչապետ Կարեն Կարապետյանը կառավարության այսօրվա նիստում հիշեցրեց, որ դեռևս 2016 թվականի սեպտեմբերի 15-ին Պետեկամուտների կոմիտեի նախագահ Վարդան Հարությունյանին հանձնարարել էր ռիսկային համարվող սուբյեկտներում և միջին ձեռնարկություններում ուսումնասիրություն անցկացնել ծայրահեղ անհրաժեշտության դեպքում։
«Մեծաթիվ հարկ վճարողներ ոչ համարժեք են ընկալել և մեկնաբանել մեր վարչարարությունն իրականացնելու այս հանձնարարականը։ Մասնավորապես առկա են հետևյալ բացասական երևույթները` իրացման շրջանառությունների և գների, աշխատողների թվաքանակի և վարձատրության մեծությունների թերհայտարարագրում, առանց հաշվարկային փաստաթղթերի ապրանքների մատակարարում, ծախսերի ուռճացում, ՀԴՄ կտրոնների շահագործման կանոնների խախտում»,- ընդգծեց գործադիրի ղեկավարը։
Նա հարկ համարեց պարզաբանել, որ մեղմ վարչարարությունը կարող է և պետք է վերաբերվի բացառապես օրինապահ հարկ վճարողներին։
«Հարկերից խուսափելու ցանկացած դրսևորում, անկախ հարկ վճարողի բնույթից, պետք է կանխվի։ Այս կապակցությամբ ՊԵԿ-ին հանձնարարում եմ հսկողություն սահմանել վերը նշված երևույթների նկատմամբ` կիրառելով ՀՀ օրենսդրությամբ նախատեսված գործիքակազմը »,- ասաց նա։
Վարչապետը հանձնարարեց նաև յուրաքանչյուր եռամսյակը մեկ վարչապետի վերահսկողական ծառայություն ներկայացնել արձանագրված խախտումների վերաբերյալ տեղեկատվություն։
Բացի այդ, պետք է պարբերաբար հրապարակել օրինապահ ու խախտումներ թույլ տված հարկատուների տվյալները։ Իսկ այն հարկատուները, որոնք կամավոր կուղղեն արձանագրված անճշտությունները, չեն ներառվի տարեկան ստուգումների ծրագրում։
