ԵՐԵՎԱՆ, 20 հունվարի — Sputnik. Բելառուսի Հանրապետության գլխավոր դատախազի տեղակալի կայացրած որոշման համաձայն` Ալեքսանդր Լապշինին կփոխանցեն Ադրբեջանին, որտեղ նրան քրեական պատասխանատվության կենթարկեն Ադրբեջանի քրեական օրենսգրքի 281.2 (պետությունների դեմ հրապարակային կոչեր) և 318.2 (Ադրբեջանի Հանրապետության պետական սահմանի անօրինական հատում) հոդվածներով:
Հիշեցնեք, որ Ալեքսանդր Լապշինն այցելել էր Լեռնային Ղարաբաղ ու իր բլոգում պատմել այդ ուղևորության մասին։ Նա քննադատաբար էր խոսել Ադրբեջանի ղեկավարության մասին։ Այնուհետև նա մեկնել էր Բելառուս, որտեղ նրան կալանավորել էին, իսկ պաշտոնական Բաքուն պահանջել է Լապշինին Ադրբեջան արտահանձնել։
ՀՀ փաստաբանների պալատի նախագահ Արա Զոհրաբյանը ֆեյսբուքյան իր էջում ներկայացրել է Բելառուսի Հանրապետության գլխավոր դատախազի տեղակալի որոշման քաղվածքը և հորդորել բոլոր իրավաբան ու լրագրող գործընկերներին միանալ Ալեքսանդր Լապշինի պաշտպանությանը։
Ըստ Զոհրաբյանի` որոշումը դեռ չեն տրամադրել Ալեքսանդր Լապշինի փաստաբաններին։
«Փաստաբանների պալատի կողմից ստեղծված աշխատանքային խումբն աշխատում է այս հարցով և իր հնարավորությունների սահմաններում մասնագիտական օժանդակություն կցուցաբերի Լապշինին։ Ալեքսանդր Լապշինը մեր պաշտպանության կարիքն ունի»,- գրել է Զոհրաբյանը։
Նա նշել է նաև, որ այս որոշումը կարող է բողոքարկվել Մինսկի քաղաքային դատարան՝ 10 օրյա ժամկետում։
