ԵՐԵՎԱՆ, 18 հունվարի-Sputnik. Արման Թաթոյանը շատ մտահոգիչ է համարում Լապշինի ձերբակալումն ու հնարավոր արտահանձնումը։
«Կարծում եմ, որ դա շատ լուրջ վտանգ է խոսքի ազատության և մարդու իրավունքների տեսանկյունից: Այն մեղադրանքները, որ վերագրվում են Ալեքսանդր Լապշինին, հակասում են եվրոպական դատարանի նախադեպային պրակտիկային, հակասում են ԵԱՀԿ խոսքի ազատության պաշտպանությանը վերաբերյալ չափանիշներին»,-ասաց Թաթոյանը։
Թաթոյանը նշեց, որ Լապշինը ճանապարհորդ է և քաղաքականության հետ որևէ առնչություն չունի։
«Այդ օրվանից ես ակտիվ աշխատում եմ գործընկերներիս հետ, ուղարկել եմ անհրաժեշտ վերլուծություններ։ Իրավական բոլոր խնդիրները վերլուծված են ու ներկայացված»,-ասաց նա։
2016 թվականի դեկտեմբերի 15-ին Մինսկում ձերբակալվել էր ՌԴ և Իսրայելի քաղաքացի Ալեքսանդր Լապշինը, ով բնակվում է Մոսկվայում և վարում հեղինակավոր Travel Blog-ը:
2011 թվականի ապրիլին, 2012 թվականի հոկտեմբերին և 2016 թվականի հունիսին Լապշինն այցելել էր Լեռնային Ղարաբաղ և այդ մասին հրապարակումներ արել իր բլոգում՝ քննադատելով Ադրբեջանի քաղաքականությունը, ինչի համար Ադրբեջանի իշխանությունները նրա նկատմամբ քրեական գործ էին հարուցել և հետախուզում հայտարարել՝ Ադրբեջանի պետական սահմանն անօրինական հատելու մեղադրանքով: Այժմ Ադրբեջանը դիմել է Բելառուսին՝ Լապշինին արտահանձնելու պահանջով:
