ԵՐԵՎԱՆ, 18 հունվարի — Sputnik. Ամուլսարի տարածքում ոսկու հանքավայրի շահագործման նախապատրաստական աշխատանքներն ընթացքի մեջ են։ Հայտնեց «Էկոլուր» ՀԿ նախագահ Ինգա Զարաֆյանն, ով այցելել է Գնդեվազ համայնք ու ծանոթացել այն տարածքին, որտեղ նախատեսվում է կառուցել ոսկու ցիանային եղանակով կորզման ֆաբրիկան։ «Ֆաբրիկան կառուցվելու է անմիջապես գյուղի տների բակում։ Դրա համար արդեն հատվել են գյուղի երբեմնի հարուստ պտղատու այգիները» — ասաց նա։
«Հայկական բնապահպանական ճակատ» քաղաքացիական նախաձեռնության անդամ Լևոն Գալստյանն էլ համոզված է, որ Ամուլսարի տարածքում հանքարդյունաբերության իրականացումը կունենա աղետալի հետևանքներ՝ հատկապես հայաստանյան ջրերի համար։ Լևոն Գալստյանի խոսքով` հանքավայրը վտանգելու է նաև Հայաստանի ջրային պաշարները։ «Վտանգելու է այն լուրջ ջրաբանական գոտին, որտեղով անցնում է Արփա-Սևան թունելը»,-նշեց նա։
Ինչ վերաբերում է հանքարդյունաբերական ծրագրի արդյունավետության ու բնությանը հասցվող վնասի նվազ լինելու մասին ՀՀ իշխանությունների պնդումներին, Լևոն Գալստյանը հայտարարեց, որ այդ պնդումներն ապացուցող փաստաթղթեր շահագործման ծրագրում չկան։ «Մեր կառավարությունը որևէ հետազոտություն չի արել, ազդեցության գնահատում չի արել, ուղղակի վերցրել է շահագործողի ծրագիրը, կոնսպեկտել ու ներկայացրել որպես ազդեցության գնահատական»։
Ամուլսարի հանքավայրը գտնվում է ՀՀ Վայոց Ձորի և Սյունիքի մարզերի սահմանագլխին, Զանգեզուրի լեռնաշղթայի հյուսիս, հյուսիս-արևմտյան ճյուղավորումների ջրբաժանային մասում, 2500-2988 մ բացարձակ բարձրությունների վրա։ Հանք շահագործող «Լիդիան Արմենիա» ընկերությունն իր ներկայացրած ծրագրում մեկ տոննա հանքանյութից ծրագրում է 0.7 գրամ ոսկի ստանալ՝ խոստանալով տարեկան 30 մլն դոլար վճարել պետական բյուջե։ Բնապահպանների համոզմամբ սա չափազանց չնչին գին է Հայաստանի բնությանը սպառնացող վտանգի դիմաց։
