ԵՐԵՎԱՆ, 17 հունվարի — Sputnik. Հանրահայտ երգիչ Սերժ Թանկյանը Facebook-ի իր էջում «իսկական հերոս» է անվանել Թուրքիայի քրդամետ «Ժողովուրդների դեմոկրատական» (HDP) կուսակցության հայ պատգամավոր Կարո Փայլանին:
«Այնպիսի նշանավոր օր, ինչպիսին այսօր է, երբ նշվում է Մարտին Լյութեր Քինգի օրը, Էրդողանի կառավարությունը վռնդում է պատգամավորին՝ Ցեղասպանության մասին հիշատակելու համար: Կարո Փայլանն իսկական հերոս է, որովհետև բավական հեշտ է ճշմարտությունն ասել մի հասարակության մեջ, որտեղ դա չունի հետևանքներ, և շատ վտանգավոր է խոսել այնտեղ, որտեղ դա ունի հետևանքներ: Ես նախորդ տարի նրան հանդիպելու բացառիկ պատիվ եմ ունեցել: Մենք քեզ հետ ենք, Կարո»,- գրել է Թանկյանը:
«Ցեղասպանություն» եզրույթի համար Կարո Փայլանին արդեն պատժել են` զրկելով խորհրդարանի առաջիկա 3 նիստերին մասնակցելու իրավունքից: Սակայն Թուրքիայի ազգայնականներն ուզում են Կարո Փայլանին զրկել պատգամավորական մանդատից։
