ԵՐԵՎԱՆ, 17 հունվարի- Sputnik. Ըստ կոմիտեի նախագահ Աշոտ Մելիքյանի այսօր ներկայացրած տարեկան զեկույցի` ամենադժվար փուլը լրագրողների համար ապրիլյան պատերազմն էր և հուլիսի երկրորդ կեսը, երբ լուսաբանում էին «Սասնա ծռեր» խմբավորման կողմից ՊՊԾ գնդի վրա զինված հարձակումն ու դրան հաջորդած իրադարձությունները:
Զեկույցի համաձայն՝ «Սասնա ծռերի» ՊՊԾ գնդում գործողությունների լուսաբանման ժամանակ խնդիրները սրվեցին և լրագրողների նկատմամբ բիրտ ուժ, բացահայտ խոչընդոտներ ու հետապնդում կիրառվեց։
Ըստ ԽԱՊԿ տարեկան զեկույցի՝ հուլիսյան իրադարձությունների ժամանակ տուժել են 27 լրագրող և օպերատոր, որոնցից 19-ը ենթարկվել են ֆիզիկական բռնության՝ ստանալով մարմնական տարբեր աստիճանների վնասվածքներ, 8 լրագրող բախվել է ճնշումների և հետապնդումների։ Իսկ այս ամենն ուղղորդվել է տեսանկարահանող սարքեր և ֆոտոխցիկներ ջարդելով, ոչնչացվել են նաև նկարահանված կադրերն ու հիշողության քարտերը:
Մելիքյանը նշեց, որ այս դեպքերի հետ կապված հատուկ քննչական ծառայությունը քրեական գործ է հարուցել և 8 անձանց մեղադրանք է առաջադրվել, բայց Խոսքի ազատության կոմիտեի գնահատմամբ` իշխանությունների գործողությունները համարժեք չեն եղել ԶԼՄ-ների ներկայացուցիչների նկատմամբ ճնշումների ծավալներին:
Ընդհանուր առմամբ, 2016-ին ԽԱՊԿ-ն արձանագրել է ֆիզիկական բռնության 10 դեպք, որոնցից տուժել է 26 լրագրող ու օպերատոր, ԶԼՄ-ների և դրանց աշխատակիցների նկատմամբ այլ ճնշումների 52 փաստ, ինչպես նաև տեղեկություններ ստանալու և տարածելու իրավունքի 33 խախտում:
2016-ին տարբեր դատարաններում վարույթ են ընդունվել ԶԼՄ-ների ու լրագրողների ներգրավվածությամբ 17 նոր դատական գործ, որոնցից 14-ը վերաբերում են վիրավորանքին և զրպարտությանը, 2-ը դրամաշորթությանը և 1 անմեղության կանխավարկածի խախտմանը:
