ԵՐԵՎԱՆ, 16 հունվարի — Sputnik. Boeing 747 բեռնատար օդանավի վթարի հետևանքով անձնակազմի երեք անդամները միանգամից մահացել են, իսկ փրկված օդաչուն շոկային վիճակում քայլել է վթարի վայրում, հաղորդում է Sputnik Ղրղըզստանը՝ հղում անելով առաջին փոխվարչապետ Մուհամետկալի Աբուլգազիևին:
Երկուշաբթի առավոտյան 7:30-ին «Մանաս» օդանավակայանի մոտակայքում գտնվող Դաչա-Սուու գյուղում կործանվել է Boeing-747 ինքնաթիռը, որը Հոնկոնգից Ստամբուլ չվերթ էր իրականացնում՝ պատրաստվելով վերալիցքավորվել Բիշքեկում: Վթարի նախնական պատճառը վատ տեսանելիությունն է:
Աբուլգազիևի խոսքով՝ փրկված օդաչուին տեղափոխել են հիվանդանոց, որտեղ նա մահացել է:
Թուրքական Hurriyet հրատարակությունը նշում է, որ Boeing 747-400F-ի երկրորդ օդաչու Կազմիմ Օնդյուլը ստացել էր ԱՄՆ պետքարտուղար Հիլարի Քլինթոնի պարգև՝ Աֆղանստանում ծառայության համար: Հրատարակության տվյալներով՝ ինքնաթիռի անձնակազմի բոլոր չորս անդամները Թուրքիայի քաղաքացիներ էին:
