ԵՐԵՎԱՆ, 16 հունվարի — Sputnik. Բիշքեկի մոտակայքում՝ «Մանաս» միջազգային օդանավակայանից ոչ հեռու ընկած Boeing-747 ինքնաթիռը պատկանել է MyCargo Airlines ավիաընկերությանը, որը կատարում է միջազգային բեռնափոխադրումներ, հաղորդում է Sputnik Ղրղըզստանը՝ հղում անելով Turkish Airlines ավիաընկերության մամուլի ծառայությանը:
Նախնական տվյալներով՝ Boeing 747 բեռնատար ինքնաթիռի կործման հետևանքով մահացել է 37 մարդ: Բեռնատար ինքնաթիռը վթարի է ենթարկվել «Մանաս» օդանավակայանի թռիչքուղուց մեկուկես կիլոմետր հեռավորության վրա երկուշաբթի առավոտյան՝ ընկնելով գյուղի վրա: Շուրջ 23 տուն քանդվել է: Ինքնաթիռում գտնվել են անձնակազմի հինգ անդամներ, մնացած զոհերը գյուղի բնակիչներ են:
«MyCargo Airlines-ի ինքնաթիռը տեղափոխում էր բեռներ, որոնք պատկանում են Turkish Airlines թուրքական ընկերությանը»,- նշել են մամուլի ծառայությունում:
2004թ-ին հիմնված MyCargo Airlines թուրքական ընկերությունը զբաղվում է միջազգային բեռնափոխադրումներով Boeing 747-400BDSF, Boeing 747-400F և Boeing 747-400ERF ինքնաթիռներով:
