ԵՐԵՎԱՆ, 16 հունվարի — Sputnik. Այսօր Ղրղըզստանում ողբերգություն է տեղի ունեցել` Բիշքեկից ոչ հեռու գտնվող Դաչա-Սուու գյուղի վրա բեռնատար ինքնաթիռ է ընկել, ինչի հետևանքով ավելի քան 30 մարդ է մահացել։ Sputnik Ղրղըզստանն այս թեմայի մասին ամփոփիչ նյութ է պատրաստել։
Ինչպես է եղել
Առաջին տեղեկությունը հրապարակվեց առավոտյան, ժամը մոտավորապես 8-ին։ Հայտնում էին, որ օդանավակայանում ընկել է Turkish Airlines («Թուրքական ավիաուղիներ») ընկերության ինքնաթիռը։ Ավելի ուշ հայտնի դարձան մանրամասները։ Առաջին փոխվարչապետ Մուհամեդկալի Աբուլգազիևի տվյալների համաձայն՝ ժամը 7.17-ին օդանավի անձնակազմը վայրէջք կատարելու թույլտվություն է խնդրել, որից հետո տեղի է ունեցել միջադեպը։
Նախնական տեղեկության համաձայն՝ ինքնաթիռն ընկել էր ոչ թե գյուղում, այլ մեկ ուրիշ վայրում։ Վթարի պահին օդանավակայանի տարածքում եղանակային պայմանները վատն էին։ Boeing-ը չէր կարողացել միանգամից վայրէջք կատարել, և օդաչուն հավանաբար որոշել էր երկրորդ պտույտը կատարել։ Սակայն դա չէր հաջողվել, և օդանավը կործանվել էր թռիչքուղուց մեկուկես կմ հեռավորության վրա` ընկնելով Դաչա-Սուու գյուղի տարածք։
Գյուղում ընդամենը 427 հողատարածք կա, դրանցից 315-ում բնակելի տներ են կառուցված։ Արտակարգ իրավիճակների նախարար Կուբաթբեկ Բորոնովի տվյալներով՝ օդանավի բեկորների տարածման մակերեսը 19 հազար քմ է կազմել։
Զոհեր և տուժածներ
Պաշտոնական վերջին տվյալների համաձայն՝ հայտնաբերվել է 32 մարդու դի։ Զոհվածների թվում են անձնակազմի բոլոր չորս անդամները։ Նրանից երեքը մահացել են միանգամից, իսկ ողջ մնացած օդաչուն շոկային վիճակում քայլել է վթարի վայրում և մահացել հիվանդանոցում։
Կործանված ինքնաթիռի բեկորների տակ փրկարարները հայտնաբերել են ողջ մնացած 13 մարդու, բոլորը հոսպիտալացվել են։ Նրանցից մեկը հղի կին է:
Ռուսաստանում աշխատող ղրղըզստանցի Զալկարբեկ Օրոզբաևն ավիաղետի հետևանքով կորցրել է գրեթե ամբողջ ընտանիքին։ Զոհվել են մայրը, քույրը, մորաքույրը, որդին և նրա բարեկամուհու որդին։ Մեկ այլ ընտանիքում զոհվել է 58-ամյա Անարբեկ Սոլթունբեկովը, նրա կինը` Ֆարիդան, 25-ամյա որդի Այբեկը և 7-ամյա դուստր Մարիան։ Զոհերի թիվը կարող էր ավելի շատ լինել, եթե չլինեին փրկարարներին օգնության հասած քաղաքացիները:
Զոհվածների հարազատների ու բարեկամների համար ժամանակավոր ճամբար է կազմակերպվել Դաչա-Սուույում, որտեղ նրանց սնունդ ու տաք հեղուկներ են տալիս: Այս մասին պատմել է ՂՀ Կարմիր կիսալուսնի ազգային հասարակության «Ընտանեկան կապերի վերականգնում» ծրագրի համակարգող Սալտանատ Աբդիժապարովը։
Բիշքեկի մի շարք ռեստորաններ և սրճարաններ հայտարարել են, որ սնունդ կհասցնեն տուժածներին։ Ալմաթիի բնակիչները սննդամթերք ու հագուստ են հավաքում տուժածների համար։ Մի երեխա երջանիկ պատահականությամբ է փրկվել։ Նա ողջ է մնացել, որովհետև ինքնաթիռի ընկնելու պահին տնից դուրս է եկել զուգարան գնալու համար:
Ո՞վ է ուսումնասիրում ավիաաղետը
Դեպքի վայրում են եղել վարչապետ Սոորոնբայ Ժեենբեկովը, նրա առաջին տեղակալ Մուհամեդկալի Աբուլգազիևը և նախարարներից մի քանիսը։ Նախարարական հանձնաժողով է ստեղծվել պատճառները պարզելու համար, հանձնաժողովը գլխավորել է Աբուլգազիևը։
Boeing 747-ի կործանման պատճառներն ուսումնասիրելու գործին միացել են նաև Թուրքիան և ԱՄՆ-ն (որպես ինքնաթիռ արտադրող երկիր), ինչպես նաև Միջազգային ավիացիոն կոմիտեն։
Ավիաաղետի վերաբերյալ տեղեկությունները կուղարկվի քաղավիացիայի միջազգային կազմակերպություն և Միջպետական ավիացիոն կոմիտե, ինչպես նաև կփոխանցվի Թուրքիայի և Միացյալ Նահանգների ավիացիոն իշխանություններին։ Միջպետական ավիացիոն կոմիտեի ներկայացուցիչներին Ղրղըզստանում սպասում են վաղը։ ԱԻՆ-ը հայտնել է, որ հայտնաբերվել է «սև արկղերից» մեկը։ Ողբերգության իրական պատճառները պարզ կլինեն մասնագետների աշխատանքների ուսումնասիրություններից հետո։
