ԵՐԵՎԱՆ, 15 հունվարի — Sputnik. «Մանչեսթեր Յունայթեդի» կիսապաշտպան Հենրիխ Մխիթարյանը TheDailyMail-ին տված հարցազրույցում պատմել է Յուրգեն Կլոպի հետ աշխատելու և «Օլդ Տրաֆորդում» կարիերայի անհաջող մեկնարկի մասին՝ հիշելով, թե ինչպես էր Բրենդան Ռոջերսը համոզում, որ «Լիվերպուլ» տեղափոխվի: Այս մասին գրում է «Մանչեսթեր Յունայթեդ» ակումբի կայքը:
Կլոպն ինձ օգնեց փոխել վերաբերմունքս
Դորտմունդի «Բորուսիայի» մարզիչ Յուրգեն Կլոպի մասին խոսելիս՝ Մխիթարյանը նշել է, որ մինչև այսօր շնորհակալ է նրան:
«Յուրգենը միշտ կողքիս էր, երբ որևէ խնդիր էր ծագում ֆուտբոլում կամ անձնական կյանքում: Նա լավ մարդ է: Նա օգնեց մաքրել ուղեղս, քանի որ ես անդադար միայն ֆուտբոլի մասին էի մտածում: Անչափ ծանր էի տանում ցանկացած պարտություն և կենտրոնանում էի իմ յուրաքանչյուր սխալի վրա: Նա բացատրեց ինձ, որ սա պարզապես կյանք է և պետք է կարողանալ թերթել այդ պահերը, քանի որ հետո ես նոր հնարավորություններ կունենամ և պետք է լավ տրամադրություն ունենամ, որպեսզի օգտագործեմ այդ հնարավորությունները: Ես սովորեցի հասկանալ, որ ամեն մարդ էլ սխալներ է գործում իր կյանքի ընթացքում, և պետք չէ այդ մասին մտածել, հատկապես՝ խաղադաշտում: Պետք է կարողանաս մոռանալ այդ պահերը»,- ասել է Մխիթարյանը:
Երկար ճանապարհ մինչև «ՄՅ»
Ես իսկապես վատ խաղացի «Սիթիի» հետ հանդիպման ժամանակ: Որպես ֆուտբոլիստ՝ ես միշտ պետք է հասկանամ, թե ինչն այնպես չարեցի, և ինչպես պետք է վարվեի: Այդ ժամանակահատվածում մենք շատ էինք զրուցում Ժոզե Մոուրինյուի հետ, և դա ինձ վստահություն էր տալիս… Ես երկար ճանապարհ եմ անցել «Մանչեսթեր Յունայթեդում» հայտնվելու համար և համոզված եմ, որ կարող եմ խաղալ այստեղ», — ասել է Մխիթարյանը:
Դերբիից մի քանի օր առաջ Հայաստանի և Չեխիայի հավաքականների խաղում Հենրիխը հարված ստացավ ոտքին և վազելու ընթացքում ցավ զգաց, բայց այդ մասին չասաց Մոուրինյուին:
«Ինձ ոգևորում էր այն միտքը, որ ես սկսելու եմ խաղալ «Մանչեսթեր Յունայթեդում», և ես պարզապես չկարողացա ասել Ժոզեին, որ ոտքս ցավում է: Եթե քեզ վստահել են, ուրեմն պիտի խաղաս: Թեև հաջորդ անգամ ես հավանաբար կասեմ, որ ավելի լավ կլինի՝ ինձ խաղադաշտ չհանել և թիմի վրա լրացուցիչ ճնշում չգործադրել», — նշել է ֆուտբոլիստը:
«Այնուհանդերձ, շատ դժվար է հրաժարվել նման հնարավորությունից: Առաջին անգամ, երբ դուրս եկա «Օլդ Տրաֆորդի» խաղադաշտ, մարմինս փշաքաղվեց: Ես վաղուց երեխա չեմ, բայց երբ տեսա 75000 երկրպագուներին, որոնք եկել էին աջակցելու «Յունայթեդին», սկսեցի հասկանալ ողջ պատասխանատվությունը: Միևնույն ժամանակ երջանկություն զգացի», — խոստովանել է Մխիթարյանը:
Պետք է պարզապես խաղալ ամբողջ սրտով
Մխիթարյանի համար «տխուր» աշունն ավարտվեց «Ֆեյենոորդի» դեմ խաղով (4:0), երբ նրան հոտընկայս ծափահարեցին:
«Այդ խաղն ամեն ինչ փոխեց: Ես թուլացած էի և պարզապես գիտեի, որ պետք է խաղադաշտ դուրս գամ և խաղամ»,- ասել է նա:
Հենրիխը համոզված է, որ ֆուտբոլում չի կարելի եսասեր լինել, այլապես դա անմիջապես կնկատի քո ակումբի երկրպագուն:
««Յունայթեդում խաղալու համար» պետք է ոչ միայն տեխնիկական հմտությունների տիրապետել, այլև սիրտդ նվիրես ակումբին: Դու այստեղ նրա համար չես, որ քեզ ցույց տաս բոլորին, այլ նրա, որ բոլորին ցույց տաս «Մանչեսթեր Յունայթեդի» մեծությունը: Սխալ է մարզադաշտ դուրս գալ այն մտքով, որ պետք է մի բան անես, ինչի համար քեզ կսիրեն երկրպագուները: Պետք է պարզապես խաղաս ամբողջ սրտով, և այդ ժամանակ երկրպագուները քեզ կսիրեն: Այլապես միանգամից կերևա, որ քեզ համար ես խաղում, ոչ թե թիմի»: Հենրիխը նաև հիշում է 2013 թվականի ամառը, երբ Դոնեցկի «Շախտյորի» խաղացողով միանգամից երեք ակումբ հետարքրվեց` «Լիվերպուլը», «Տոտենհեմը» և Դորտմունդի «Բորուսիան»:
Կարիճի հարվածը
Ընթացիկ խաղաշրջանի ամենավառ պահերից մեկը Հենրիխի գոլն էր, որը նա խփեց «կարիճի հարվածով»:
«Ես անձնական մրցանակների համար չեմ խաղում և նպատակ չունեմ մարդկանց ցույց տալու, որ ես կարող եմ նման գոլեր ունենալ: Ամեն դեպքում ամեն ինչ տեղի ունեցավ վայրկյանների ընթացքում: Ես նույնիսկ չեմ պլանավորել նման հարված հասցնել, սակայն տեսա, որ գնդակը մեջքիս հետևում է և ակնթարթային որոշում կայացրի»:
«Ես իմ գոլը Ժիրուի գոլի հետ չհամեմատեցի և չփորձեցի պարզել, թե որն է ավելի լավը: Դրանք տարբեր խաղեր էին, տարբեր իրավիճակներ` երկու գոլերն էլ բավական գեղեցիկ ստացվեցին: Նման պահերը հետաքրքիր են դարձնում Պրեմիեր Լիգան»,- ասել է Մխիթարյանը:
Русская версия
