ԵՐԵՎԱՆ, 5 հունվարի-Sputnik. ՀՀ քաղաքացի Ա. Հ.-ն 2016թ. դեկտեմբերի 31-ից գտնվելով Թուրքիայի Հանրապետության տարածքում, իրացնելու նպատակով ապօրինի ձեռք է բերել առանձնապես խոշոր չափերի` «հերոին» ու «մեթամֆետամին» տեսակի, թմրամիջոցների խմբաքանակ և Ստամբուլ-Երևան չվերթով տեղափոխել Հայաստան:
Թմրամիջոցների ներկրումը կանխվել է ՀՀ Ազգային անվտանգության ծառայության իրականացրած օպերատիվ-հետախուզական միջոցառումների արդյունքում:
2017թ. հունվարի 3-ին «Զվարթնոց» օդանավակայանում մաքսային հսկողության «կարմիր ուղին» հատելուց հետո թմրամիջոցները հայտնաբերել են ԱԱԾ աշխատակիցները:
Առերևույթ հանցագործության դեպքի առթիվ հարուցվել է քրեական գործ՝ ՀՀ քրեական օրենսգրքի 267.1-րդ հոդվածի 4-րդ մասի 1-ին կետով և 266-րդ հոդվածի 3-րդ մասի 2-րդ կետով (իրացնելու նպատակով առանձնապես խոշոր չափերով թմրամիջոցներ ապօրինի ձեռք բերելը, պահելը, փոխադրելը և ՀՀ պետական սահմանով առանձնապես խոշոր չափերով թմրամիջոցների մաքսանենգություն կատարելը). տեղեկությունը հաղորդել են ՀՀ ԱԱԾ մամուլի կենտրոնից:
Ա. Հ.-ն ձերբակալվել է, կատարվում է նախաքննություն:
