ԵՐԵՎԱՆ, 5 դեկտեմբերի — Sputnik, Խաչիկ Չախոյան. Ռիոյի օլիմպիական խաղերում էլ մենք մեդալի ակնկալիքներ ունեինք առաջին հերթին Հարություն Մերդինյանից, որը նժույգաթափերի վրա մտավ եզրափակիչ: Բայց մեդալ վաստակել չհաջողվեց: Իսկ տարեվերջում Վահագն Դավթյանն ու Արթուր Դավթյանը նոր հաղթանակներ մեզ պարգևեցին: Հավաքականի գլխավոր մարզիչ Հակոբ Սերոբյանի հետմենք ամփոփեցինք 2016 թվականը:
Հակոբ Սերոբյանը ոչ միայն Հայաստանի հավաքականի գլխավոր մարզիչն է, այլ նաև միջազգային կարգի մրցավար, որը սպասարեկել է օլիմպիական խաղերը: Մեր մարզչի կարծիքով՝ տարին շատ հաջող սկսվեց աշխարհի գավաթի խաղարկությունում: Հարություն Մերդինյանը չեմպիոն դարձավ, մեդալներ վաստակեցին Վահագն Դավթյանն ու Արթուր Թովմասյանը: Իսկ ահա Եվրապայի առաջնությունը անակնկալ էր ոչ միայն մեր մրցակիցների, այլ նաև մեր մարզիչների համար:
Բեռնում Հարություն Մերդինյանը աշխարհամասի չեմպիոն հռչակվեց նժույգաթափերի վրա, արծաթե մեդալներ վաստակեցին Վահագն Դավթյանը, Արթուր Դավթյանը, Արթուր Ավետիսյանը և դարձան փոխչեմպիոններ: Հիանալի արդյունք էր, որով արդեն մեծ ակնկալիքներ ոնեցանք օլիմպիական խաղերում:
Բացի այս ամենից, Հայաստանի հավաքականը առաջին անգամ մրցումների մասնակցեց թիմային հաշվարկում: Սա նշանակում է, որ մենք ոչ թե մեկ կամ երկու, այլ միջազգային մրցումների մակարդակին համապատասխան թիմ ունենք, որը կարող է և պայքարել թիմային հաշվարկում: Հայ մարզիչների աշխատանքը այս առումով շատ բարձր գնահատականի է արժանի: Սակայն թիմային հաջողության հասնելու համար մենք խնդիրներ ունենք:
Հակոբ Սերոբյանը նշեց, որ մարմնամարզության դահլիճը չի համապատասխանում պահանջներին: Բացի այդ, միայն վերջերս է ձեռք բերվել պտտաձողը, որը դեռ տեղադրված չէ: Իսկ զուգափայտերը մեր մարզիկները ձեռք են բերել սեփական մջոցներով:
Հաշվի առնելով մեր մարմնամարզիկների արդյունքները, պետք է շատ մեծ ուշադրություն դարձնել այս մարզաձևին: Հակոբ Սերոբյանը նկատեց, որ արդեն մեծացել է մարմնամարզության ֆեդերացիայի բյուջեն:
Օլիմպիական կոմիտեն այն 21 միլիոն դրամից հասցրել է 41 միլիոն դրամի: Այսինքն՝ արդեն ուսումնամարզական հավաքները կարող է կազմակերպել հենց ֆեդերացիան: Սակայն այսքանով, կարծում ենք, չպետք է բավարարվել: Տարեվերջին Ռուսաստանում անցկացված Վորոնին հուշամրցաշարում Արթուր Դավթյանը յոթ մեդալ վաստակեց՝ հերթական անգամ ապապցուցելով, որ մարմնամարզությունը մեծ վերելք է ապրում:
Այո, Հայաստանի մարմնամարզիկները 2016 թվականին իրենց հաղթանակներով նոր էջ գրեցին այս մարզաձևի պատմության մեջ: Հիմա մենք արդեն մեր մարմնամարզիկներից մեդալներ ենք սպասում բոլոր մրցումներում: Տղաներին մարզվելու համապատասխան դահլիճ ու մարզվելու գործիքներ ապահովելու դեպքում մենք արդեն նոր բարձրունքներ կարող ենք նվաճել: Չէ՞ որ Հայաստանը մարմնամարզությունում հարուստ պատմություն ունի:
