ԵՐԵՎԱՆ, 26 դեկտեմբերի — Sputnik. Անկախ նրանից, որ անցնող տարին դժվար էր Հայաստանի տնտեսության համար, երկիրը որոշակի հաջողություններ գրանցեց, կարծում է «Մարդասիրական զարգացման միջազգային հասարակական կազմակերպության» տնօրենի տեղակալ Ծովինար Կոստանյանը։
«Ընդհանուր առմամբ տարին բարդ էր հայկական տնտեսության համար։ Երկրի ներսում նվազել են ներմուծման, ապրանքաշրջանառության, շինարարության ծավալները ։ Սակայն կան նաև որոշակի դրական արդյունքներ։ Հատկանշական է, որ դրանք բոլորը կապված են Ռուսաստանի և եվրասիական վեկտորի հետ», — ասել է նա Sputnik Արմենիա մուլտիմեդիոն մամուլի կենտրոնում «ԵՏՄ մեխանիզմների և ինստիտուտների դիտարկումը» թեմայով կազմակերպած Աստանա-Բիշքեկ-Երևան-Սարատով տեսակամուրջի ժամանակ։
Կոստանյանը նշել է, որ ԵՏՄ-ում Հայաստանի երկրորդ տարվա անդամակցությունը նշանակալի էր մի շարք հանգամանքների պատճառով։
«Հենվելով պաշտոնական վիճակագրական տվյալների վրա, կարելի է պնդել, որ զգալիորեն աճել են Հայաստանից Ռուսաստան արտահանման ծավալները։ Աճը կազմել է ավելի քան 50%։ Համեմատության համար կարելի է նշել, որ ԵՄ երկրներ արտահանման ծավալների աճը 10%-ից մի փոքր ավել է կազմել։ Շատ կարևոր է, որ այս տարի անցյալ տարվա համեմատ 87%-ով ավելացել է դեպի Ռուսաստան գյուղմթերքի արտահանումը։ Հայաստանի անկախությունից ի վեր սա ամենաբարձր ցուցանիշն է», — ասել է նա։
Կոստանյանի խոսքով` աճի միտումը կարող է պահպանվել նաև հաջորդ տարի։
«Հայ և ռուս փորձագետները կարծում են, որ Հայաստանը բոլոր շանսերն ունի ավելացնելու գյուղմթերքի և լայն սպառման մյուս ապրանքների արտահանումը, հատկապես որ Ռուսաստանը կշարունակվի ներմուծման քաղաքականությունը։ Սա նշանակում է, որ աճի միտումը կարող է պահպանվել նաև 2017 թվականին», — ընդգծել է նա։
Փորձագետն ավելացրել է, որ Հայաստանում նկատվում է նաև արդյունաբերական արտադրանքի աճ` ավելի քան 7%։ Բացի այդ, աճել է նաև Հայաստանի նկատմամբ ռուս զբոսաշրջիկների հետաքրքրությունը։
«Ինչպես կարծում են մեր փորձագետները, եվրասիական տարածքի երկրներից Հայաստանն ունի զբոսաշրջության զարգացման զգալի ներուժ։ Հայաստանի նկատմամբ ռուս զբոսաշրջիկների հետաքրքրությունն ավելացել է չորս անգամ, իսկ Հայաստանում Ամանորի արձակուրդներն անցկացնել ցանկացողների թիվը` 11%-ով», — հայտնել է նա։
Կոստանյանի խոսքով` Հայաստանը միակ երկիրն է, որն ընդլայնել է արտահանումը դեպի ԵՏՄ շուկա։
«Հայաստանից դեպի ԵՏՄ երկրներ արտահանումն արդյունաբերական ոլորտում ավելացել է 1.6 անգամ, գյուղմթերքի` 1.4 անգամ, տեքստիլի և կոշիկի` 2.5 անգամ։ Սա խոսում է այն մասին, որ Հայաստանը վերականգնում է իր տնտեսությունը։ Բացի այդ, Հայաստանը գրանցել է ՀՆԱ-ի աճի ամենաբարձր ցուցանիշը։ 2016 թվականի առաջին կիսամյակին այն կազմել է 2,8%, ինչն ավելի բարձր է, քան ԵՏՄ-ում միջինում», — նշել է նա։
Կոստանյանը նաև ընդգծել է, որ Հայաստանը ԵՏՄ-ին անդամակցելու շնորհիվ բարելավել է իր դիրքերը արտաքին առևտրի գլոբալ վարկանիշում` բարձրանալով 58-րդ տեղից 29-րդ տեղը։
Նյութի ռուսերեն տարբերակը
