ԵՐԵՎԱՆ, 22 դեկտեմբերի — Sputnik. ՀՀ ԱԺ արտաքին հարաբերությունների մշտական հանձնաժողովն ու ՌԴ Դաշնային ժողովի Պետական դումայի ԱՊՀ գործերով, եվրասիական ինտեգրման և հայրենակիցների կապերի կոմիտեն Երևանում անցկացվող համատեղ նիստը սկսեցին մեկ րոպե լռությամբ` հարգելով Թուրքիայում սպանված ՌԴ դեսպան Անդրեյ Կառլովի հիշատակը:
Նիստի ընթացքում երկու երկրների խորհրդարանականները հիմնականում տնտեսական հարցեր քննարկեցին: ՌԴ պետդումայի ԱՊՀ, Եվրասիական ինտեգրման ու հայրենակցական կապերի հանձնաժողովի փոխնախագահ Վիկտոր Վոդոլացկին, ներկայացնելով ԵՏՄ անդամակցությունից ի վեր հայաստանյան տնտեսության մեջ գրանցված տեղաշարժը, նշեց, որ վերջին երկու տարիներին աճել է ՌԴ-ի և ՀՀ-ի միջև առևտրաշրջանառությունը: Բացի այդ, նրա խոսքով, Հայաստանը ԵՏՄ անդամ միակ երկիրն է, որին այս տարի հաջողվել է առաջին կիսամյակի տվյալներով 2.8 տոկոս տնտեսական աճ է գրանցել:
Բանախոսը նաև կանխատեսեց, որ 2017թ-ին երկու երկրների միջև առևտրաշրջանառությունը կավելանա 14 մլրդ դոլարով:
Այդուհանդերձ, ՀՀ ԱԺ արտաքին հարաբերությունների մշտական հանձնաժողովի նախագահ Արտակ Զաքարյանի կարծիքով, տնտեսական աշխուժություն առայժմ տեսանելի չէ ո՛չ հանրության, ո՛չ էլ բիզնեսի համար:
«Մենք փորձում ենք մասնագետների և փորձագետների հետ համատեղ հասկանալ՝ ինչ ունեն անելու խորհրդարանականներն առաջիկա տեսանելի ժամանակահատվածում բիզնես նախագծեր առաջ տանելու, քաղաքական աջակցություն ցուցաբերելու ուղղությամբ, որպեսզի մենք հայ-ռուսական համատեղ բիզնես նախագծերին կարողանանք ավելի ակտիվ ընթացք հաղորդել»,- ասաց Զաքարյանը:
ՌԴ պետդումայի ԱՊՀ, Եվրասիական ինտեգրման ու հայրենակցական կապերի հանձնաժողովի նախագահ Լեոնիդ Կալաշնիկովն էլ իր խոսքում նշեց, որ ԵՏՄ տարածքում ընթանում է օրենսդրության համապատասխանեցման գործընթաց, որի արդյունքում մի քանի տարի անց նախատեսվում է ունենալ մեկ միասնական համակարգ:
«Վաղ թե ուշ մենք կմոտենանք այն ընդհանուր շուկային, որի հիմքերն այսօր են դրվում: Վերջնական արդյունքում կունենանք նաև միասնական էներգետիկ, վառելիքի շուկա: Իհարկե ոչ միանգամից, բայց աստիճանաբար կլինի: Մոսկվան ու Երևանն էլ միանգամից չեն կառուցվել»,- ասաց նա:
Հաջորդ կարևոր ոլորտը, որ գտնվում է հայ և ռուս խորհրդարանականների ուշադրության կենտրոնում,՝ տարածաշրջանի անվտանգության խնդիրն է: Ռուսաստանցի խորհրդարանականները հատկապես շեշտը դնում են ահաբեկչության սպառնալիքի վրա՝ միաժամանակ նշելով, որ ՀԱՊԿ անդամ երկրները մշտապես աշխատում են այդ սպառնալիքը միասնական ուժերով չեզոքացնելու ուղղությամբ:
