Լաուրա Սարգսյան, Sputnik.
Ալեքսանդրովի անվան երգի ու պարի համույթի պատմությունը սկիզբ է առնում XX դարի 20-ականների վերջից։ Համաշխարհային ճանաչում ունեցող օպերային երգիչ Բարսեղ Թումանյանը միացել է կոլեկտիվին 1983 թվականին։
«Երբ մոտեցավ զորահավաքի ժամանակը, պարզվեց, որ պետք է ծառայեմ Աֆղանստանում։ Հայաստանում ինձ խորհուրդ տվեցին փորձել համալրել համույթի շարքերը, ինչ էլ ես արեցի», — Sputnik Արմենիայի հետ զրույցում պատմեց Թումանյանը։
Երգչին կոլեկտիվ ընդունեցին առաջին իսկ լսումներից հետո։ Այդ պահից սկսած` նրա կյանքում նոր ժամանակաշրջան սկսվեց` լի շրջագայություններով և ուղևորություններով։ Երկու-երեք տարվա ընթացքում Թումանյանը համույթի հետ եղավ շատ երկրներում (Ֆրանսիա, Գերմանիա, ԱՄՆ ու Կանադա` չհաշված ԽՍՀՄ-ի բոլոր երկրները)։
Դա ծաղկման շրջան էր կոլեկտիվի համար, որի նպատակն էր բարձր արվեստը հասցնել հասարակության լայն զանգվածներին։ Հենց դրա համար էին կոլեկտիվին սիրում և՛ ԽՍՀՄ-ում, և ԽՍՀՄ-ի սահմաններից դուրս։ Համույթի երգացանկում ընդգրկված էր շուրջ 3000 երգ, որոնց թվում նաև հայկական երգեր կային։
Թումանյանը կոլեկտիվում աշխատեց մինչև 1987 թվականը։
«Կանոնակարգով մենք միշտ պետք է զինվորական համազգեստով լինեինք։ Մի անգամ ԱՄՆ-ում, հյուրախաղերի ժամանակ մենք որոշեցինք զբոսնել քաղաքում և խանութ մտնել։ 200 հոգի էինք, բոլորս` զինվորական համազգեստով։ Վաճառողներից մեկը մեզ տեսնելուց հետո կորցրեց խոսելու ունակությունը և ձեռքերը վեր բարձրացրեց», — պատմեց Թումանյանը։
Ամերիկացին կարծել է, թե Կարմիր բանակն օկուպացրել է Միացյալ Նահանգները։
Ալեքսանդրովի անվան համույթը Հայաստանում է եղել ավելի քան 40 տարի առաջ։ Բարսեղ Թումանյանը դեռ տասը տարի առաջ էր ուզում համույթին Երևան բերել, բայց ինչ-ինչ պատճառներով համերգն այդպես էլ չկայացավ։ Ռուսաստանի ամենախոշոր զինվորական գեղարվեստական համույթը քառօրյա համերգներով Հայաստան եկավ 2015 թվականի հոկտեմբերին ։
Ծառայությունից հետո Թումանյանը դուրս եկավ համույթից և սկսեց հարթել համաշխարհային օպերայի բեմեր տանող ուղին։
«Համույթի կորիզը կոտրվեց, ինձ թվում է` ես էլ կոտրվեցի»,- ասաց նա։
Ռուսաստանի պաշտպանության նախարարության Տու-154 ինքնաթիռը դեկտեմբերի 25-ի առավոտյան ժամը 05:25 —ին դուրս է եկել Ադլերի օդանավակայանից և ուղղվել դեպի Սիրիա։ Երկու րոպե անց օդանավն անհետացել է ռադարի էկրաններից։ Ավելի ուշ ինքնաթիռի բեկորները հայտնաբերել են Սև ծովում, ափից 1.5 կմ հեռավորության վրա։ Օդանավում 92 մարդ է եղել` 84 ուղևոր և անձնակազմի 8 անդամ, բոլորը զոհվել են։ Ուղևորների թվում են եղել նաև Ալեքսանդրովի անվան համույթի 65 անդամները (երգչախմբի գրեթե ողջ կազմը` առանց 3 մենակատարների)։
Ալեքսանդրովի անվան Ռուսական բանակի երգ ու պարի ակադեմիական համույթը, որը երկու անգամ դարձել է Կարմիր դրոշի շքանշանակիր, Ռուսաստանի խոշորագույն զինվորական գեղարվեստական կոլեկտիվն է։ Հիմնադրման օրը համարվում է 1928 թվականի հոկտեմբերը, երբ կոլեկտիվը 12 հոգանոց կազմ առաջին անգամ ելույթ ունեցվ Կարմիր բանակի կենտրոնական տանը։ Արդեն 30-ականների կեսերին համույթի կազմը հասավ 300 հոգու, իսկ նրա հանրաճանաչությունը դուրս եկավ Ռուսաստանի սահմաններից։
Նյութի ռուսերեն տարբերակը
