ԵՐԵՎԱՆ, 24 դեկտեմբերի — Sputnik. Եթե սկսենք ամենասկզբից, պետք է ասենք, որ կար մի տղա: Տղայի կյանքում անընդհատ մի բան պակասում էր: Սկզբում նա չուներ երջանիկ մանկություն: Տասը տարի մանկատանն ապրելով՝ նա ոչ միայն չէր տեսել այն ամենն, ինչ իրեն շրջապատում է, այլև զրկված էր ամենակարևորից՝ ծնողական ջերմությունից:
Տղան ի ծնե կույր էր, և ծնողները հրաժարվեցին նրանից: Անահիտ Հովհաննիսյան անունով մի բարի կին Երևանից, իր ամուսնու` քահանա Տեր-Գրիգոր Հովհաննիսյանի հետ, որդեգրեցին տղային, ու միայն հետո նկատեցին նրա երաժշտական կարողությունները:
Երեք տարի առաջ Հովհաննեսը դարձավ «Սպիտակ ձեռնափայտ» միջազգային բարեգործական փառատոնի մասնակից, հիանալի ներկայացավ նախընտրական փուլին, որից հետո Դիանա Գուրցկայան առաջարկեց Հովհաննեսին դուետ երգել:
Երգը կոչվում էր «Հայ իմ աշխարհ»: Նրանց համատեղ ելույթը շլացուցիչ հաջողություն ունեցավ, որից հետո երկուսն էլ` ռուսական էստրադայի աստղն ու անհայտ հայ տղան, երգ ձայնագրեցին Դիանայի երգացանկից: Այն կոչվում էր «Укажи нам, Боже, светлый путь во тьме»: Ինչպես տեսնում ենք, երգի լեյտմոտիվը պատահական չէ:
«Հովհաննեսն ուրախ երեխա է, շփման մեջ բաց, այժմ նա Երևանում սովորում է վատ տեսողություն ունեցող երեխաների համար նախատեսված դպրոցում,-պատմում է Անահիտ Հովհաննիսյանը: «Երաժշտական ունակությունները նրան բերեցին Ղազարոս Սարյանի անվան մշակույթի դպրոց, որտեղ նրա հետ աշխատում են վոկալի ուսուցչուհի Մարիաննա Կարապետյանը, կոնցերտմայսթեր Քնարիկ Մուրադյանը` երկուսն էլ հիանալի մասնագետներ են: Կցանկանայի Sputnik Արմենիայի միջոցով խորին երախտագիտություն հայտնել այս հիանալի մարդկանց: Խոնարհվում եմ Ձեր առջև»,-նշում է երեխայի մայրը:
Օրեր առաջ Անահիտը զանգահարեց Կանադայից, փոխանցեց վերջին նորությունները: Լավ նորություններ են: Սակայն դրանց մասին մի փոքր ուշ: Անահիտն՝ ամուսնու հետ, մեղմ ասած, ապրում է ոչ շռայլ կյանքով: Եթե չլիներ Միչիգանում բնակվող զարմուհու՝ Լիլիթ Գրիգորյանի օգնությունն ու աջակցությունը, նրանց առավել դժվար կլիներ: Սակայն աշխարհում, ինչպես տեսնում ենք, բարի մարդիկ շատ կան:
Եվս մեկ երեխայի որդեգրել (Անահիտը ունի սեփական երկու երեխա) առանց այն էլ փոքր բնակարանում` ամեն մարդ չի անի: Մանավանդ, քչերը կհամաձայնեին օգնել մեկին, ով քեզ կյանքում տեսնելու, քո դեմքը ճանաչելու հնարավորություն չի ունենա: Ոչ այսօր, ոչ վաղը` երբեք:
«Կույր մարդիկ շոշափելով են ապրում», — իր «Կույր երաժիշտների մասին» բանաստեղծության մեջ գրել է Իոսիֆ Բրոդսկին:
Բայց, մյուս կողմից, շոշափելը հնարավորություն է տալիս հստակ որոշել, թե ովքեր են դիմացդ կանգնածները: Իսկ Հովհաննեսի կողքին կանգնած մարդիկ, ինչպես շոշափելով, այնպես էլ դեմ առ դեմ, անկասկած, հիանալի մարդիկ են: Եվ նրանք, ովքեր նրա հետ դուետ են կատարում` Դիանա Գուրցկայան, երգչուհի Զառան, և նրանք, ովքեր կազմակերպում են Հովհաննեսի համերգներն և ու մենահամերգները: Վերջերս նա ելույթ ունեցավ Վիեննայում, երգում էր Վագների անվան կոնսերվատորիայում, այնուհետև` Սլովենիայում: Համերգը կազմակերպել, ինչպես նաև երեխային վարպետության դաս էր տվել օպերային երգչուհի Լյուբով Կազարնովսկայան: Այսօր «Սպիտակ ձեռնափայտ» փառատոնին մասնակցում են աշխարհի 30 երկրից ժամանած տեսողության հետ խնդիր ունեցող մարդիկ:
Այժմ պատմենք, թե ինչպես Անահիտը հայտնվեց Կանադայում, և ինչով է այնտեղ նա զբաղվում: Հովհաննեսից հետո ամուսինները ևս մեկ մանկատան երեխա որդեգրեցին՝ տասներկուամյա Հուսիկին: Հուսիկին Աստված ոչ միայն հայրական տնից էր զրկել, երեխան ի ծնե հաշմանդամություն ուներ: Այսօր արդեն, ինչպես պնդում է Անահիտը, հաշմանդամությունը չի խանգարում նրան ապրել լիարժեք կյանքով:
«Հուսիկն այցելում է նույն արվեստի դպրոցը Երևանում, ուր հաճախում է Հովհաննեսը, խաղում մանկական ներկայացումներում, զբաղվում շախմատով», — ասում է բազմազավակ մայր Անահիտ Հովհաննիսյանը:
Ես խնդրեցի պատմել, թե ինչպես նրանք հայտնվեցին Կանադայում:
«Այժմ մենք հետազոտություններ ենք անցնում մանկական կլինիկայում, սպասում ենք, երբ վիրահատություն կնշանակեն: Բազում տաղանդավոր և օժտված երեխաներ կան, որոնք ունեն նման խնդիրներ: Ինչպես օգնել նրանց: Պետք է առաջին քայլն անել, մնացածն աստված կօրհնի», — համոզված է եկեղեցականի կին ու չորս երեխաների մայր Անահիտ Հովհաննիսյանը:
Sputnik տեղեկատվական գործակալությունը և ռադիոն դարձել են ռուսական ՆՏՎ հեռուստաընկերության «Դու գերաստղ ես» մանկական վոկալային մրցույթի միջազգային տեղեկատվական գործընկերը։ Մրցույթը կմեկնարկի 2017թ-ի սկզբին։
«Դու գերաստղ ես» նոր նախագիծը հնարավորություն կտա ծնողազուրկ տաղանդավոր երեխաներին տեղեկացնել իրենց մասին։ «Դու գերաստղ ես» մրցույթի մասնակիցները մանկատների և տուն-ինտերնատների սաներն են։ Հետխորհրդային տարածքից 7-18 տարեկան տաղանդավոր երեխաները կարող են ցուցադրել իրենց վոկալային հնարավորությունները պրոֆեսիոնալ ժյուրիին և միլիոնավոր հանդիսատեսին, նրանք հնարավորություն կունենան աշխատել լավագույն երաժշտական մանկավարժների և պրոդյուսերների հետ։
Մաղթենք նրանց երջանկություն և հաջողություն գալիք տարում:
Նյութի ռուսերեն տարբերակը
