ԵՐԵՎԱՆ, 24 դեկտեմբերի — Sputnik. Երևանի Մխիթար Հերացու անվան պետական բժշկական համալսարանում այսօր կայացավ Հոգաբարձուների խորհրդի թիվ 9-րդ նիստը: Այս մասին տեղեկացնում ենք բուհի կայք էջից:
Նիստի օրակարգում մեկ հարց էր՝ ռեկտորի ընտրությունը: Ռեկտորի պաշտոնակատար և առաջադրված միակ թեկնածու Արմեն Մուրադյանը հակիրճ ներկայացրեց բուհի զարգացման իր տեսլականը, այնուհետև պատասխանեց խորհրդի անդամների հարցերին:
Նշենք, որ Հոգաբարձուների խորհրդի 32 անդամներից նիստին ներկա էր 30-ը: Ըստ Արմեն Մուրադյանի ներկայացրած բուհի զարգացման իր ծրագիրի՝բժշկական համալսարանն ունի զարգացման 3 հիմնական ուղղություն՝ կրթությունը, բժշկական ծառայությունները և գիտությունը։
Ծրագրի համաձայն՝ կրթության զարգացման նպատակն է հիմնադրամի կրթական մակարդակի բարձրացումը և միջազգային որակի կրթություն տրամադրումը, որի շնորհիվ հնարավոր կլինի հիմնադրամի կրթական օջախները դարձնել տարածաշրջանային կենտրոններ։ Բացի այդ, նախատեսվում է ոչ միայն ավելացնել արտասահմանցի ուսանողների թիվն արդեն իսկ ծանոթ երկրներից, այլև նոր երկրներից ներգրավել ուսանողներ։ Բժշկական ծառայությունների զարգացման հիմնական նպատակն է խթանել բժշկական զբոսաշրջության զարգացմանը՝ տրամադրելով ծառայություններ, որոնք գնային և որակական ցուցանիշներով մրցունակ կլինեն միջազգային շուկայում։
Կարևորելով գիտության դերը, ինչպես կրթության այնպես էլ բժշկական ծառայությունների զարգացման մեջ՝ հիմնադրամն իր առջև նպատակ է դրել զարգացնել գիտական ներուժը՝ դառնալով գիտաբժշկական կենտրոն։ Ամփոփելով նիստը` Հոգաբարձուների խորհրդի նախագահ Արմեն Աշոտյանը շնորհավորեց նորընտիր ռեկտորին՝ նշելով, որ խորհուդը պատրաստակամ է հնարավորինս աջակցել բուհի նոր ղեկավարին, կոլեկտիվին և ուսանողությանը` կրթական, գիտական, առողջապահական ու վարչարարական բոլոր ծրագրերի իրականացման գործում:
Նյութի ռուսերեն տարբերակը
