ԵՐԵՎԱՆ, 21 դեկտեմբերի — Sputnik. ԱՊՀ-ն հիմա ավելի ուժեղ է, քան երբևէ, թեև սկզբում կառույցի շուտափույթ վախճան էին կանխագուշակում: Նման կարծիք հայտնեց Դաշնության խորհրդի միջազգային հարցերի հանձնաժողովի առաջին տեղակալ Վլադիմիր Ջաբարովը Մոսկվա-Երևան-Աստանա-Բաքու-Բիշքեկ-Քիշնև-Մինսկ տեսակապի ընթացքում։
«ԽՍՀՄ փլուզումից հետո յուրաքանչյուրը փակվեց իր ազգային բնակարանում, որոշակի դժվարություններ եղան, հատկապես՝ առաջին տասը տարիներին… Սկզբում բոլորը ԱՊՀ-ի համար շուտափույթ վախճան էին կանխագուշակում, սակայն, բարեբախտաբար, առողջ բանականությունը հաղթեց. ԱՊՀ-ն ողջ է, և իմ կարծիքով այն հիմա ավելի ուժեղ է, քան երբևէ։ Առաջին հերթին, մենք, ըստ էության, ոչ մեկին չենք կորցրել, բացառությամբ Վրաստանի, որը դարձավ ԱՊՀ անդամ բոլորից ուշ և բոլորից շուտ էլ դուրս եկավ, բոլոր մյուս հիմնադիր երկրները մնացին», — «Անկախ պետությունների համագործակցության 25 տարիները. կորուստների և ձեռքբերումների ուղին» թեմայով քննարկման ժամանակ ասաց նա։
Ջաբարովի խոսքով` ԱՊՀ գլխավոր կորուստն այն էր, որ Ուկրաինան դուրս եկավ կառույցից։
«Թեև Ուկրաինան դեռ պաշտոնապես դուրս չի եկել ԱՊՀ-ից, բայց այլևս չի մասնակցում խորհրդարանական վեհաժողովին, գագաթնաժողովներին… Սակայն, չնայած այդ ամենին, մենք միասին ենք։ Մեր ժողովուրդների մտածողությունն այնպիսին է, որ մենք չենք կարող վերջնականապես բաժանվել և բացարձակ օտար զգալ մեզ։ Մենք կարծում ենք, որ մենք բոլորս յուրայիններ ենք։ Երիտասարդ սերունդը, որն այս 25 տարվա ընթացքում մեծացել է, նույնպես այդպես է մտածում, թեև երբեք չի ապրել ԽՍՀՄ-ում», — ասաց Ջաբարովը։
ԱՊՀ Գործադիր կոմիտեի տնտեսական համագործակցության բաժնի տնօրեն Անդրեյ Կուշնիրենկոն էլ ընդգծեց, որ ԱՊՀ երկրները հստակ գիտակցում են, որ միասին ուժեղ են։
«Այդ ազդակը և գործնական հարցերի ուղղվածությունը Ռուսաստանի նախագահության միջուկն են կազմում (2017թ-ին ԱՊՀ-ում կնախագահի Ռուսաստանը, խմբ.), նշմարվում է միջոցառումների հստակ ծրագիր։ Ի՞նչ է հաջողվել անել։ Բավական լավ զարգանում է համագործակցությունը կապի, տրանսպորտի, էներգետիկայի, գիտատեխնիկական, ինչպես նաև գյուղատնտեսության ոլորտներում… Իսկ ի՞նչը չի ստացվել։ Արդյունաբերական քաղաքականության շատ ուղղություններով չի հաջողվել հանգել բազմակողմանի համագործակցության», — ասաց նա։
ԱՊՀ տնտեսական զարգացման գործարար կենտրոնի գլխավոր տնօրեն Վլադիմիր Սավչենկոն ավելացրեց, որ կազմակերպության շրջանակում բիզնեսի զարգացման համար շուկա է պետք։
«Շուկային պետք են բիզնես և տարածքներ։ ԱՊՀ-ն պահպանել է տարածքները, պահպանում է այդ շուկան և աշխատում ընդհանուր շուկայի բովանդակության ու գործունեության կանոնների, ինչպես նաև ընդհանուր ենթակառուցվածքի ստեղծման վրա», — ընդգծեց նա։
Սավչենկոյի խոսքով` ԱՊՀ-ն այսօր հստակ աշխատում է իր շուկաների պահպանման ուղղությամբ։
«Բիզնեսին նախևառաջ ազատ առևտրի գոտի է պետք… Ընդհանուր առմամբ Վրաստանը դուրս չի եկել տնտեսական կապերից, դուրս չի եկել նաև Ուկրաինան, թեև որոշակի նրբություններ կան…», — ասաց նա։
Սավչենկոն ընդգծեց նաև, որ Ռուսաստանը միշտ ուշադրություն է դարձել բիզնեսի վիճակին։
«Ռուսաստանն այսօր հայտարարում է, որ համակողմանի աջակցություն կցուցաբերի բիզնեսին, որպեսզի այն ազատ զարգանա ԱՊՀ տարածքի շուկաներում», — եզրափակեց նա։
Հայաստանի Ազգային ժողովի պատգամավոր, ԱՊՀ անդամ երկրների միջխորհրդարանական վեհաժողովի ներկայացուցիչ Հայկ Բաբուխանյանը նշեց, որ 25 տարին լուրջ ժամկետ է միջազգային կազմակերպության համար։
«ԱՊՀ-ն ապացուցել է, որ կենսունակ է և օգտակար մեր երկրներին ու ժողովուրդներին։ 25 տարի առաջ, երբ փլուզվեց ԽՍՀՄ-ը, պետք էր ստեղծել ինչ-որ ձևաչափ` շփվելու համար այն երկրների հետ, որոնք ընդհանուր պետության մաս էին կազմում։ Մենք ստեղծեցինք ԱՊՀ-ն և ճիշտ արեցինք», — ասաց նա։
Բաբուխանյանի խոսքով` կազմակերպության զարգացման վեկտորը սկզբում կենտրոնախույս էր, հետո իրավիճակը փոխվեց։
«Մենք բավական դժվար ուղի ենք անցել։ Իհարկե, եղել են ճգնաժամային պահեր, բայց մեզ հաջողվել է պահպանել մեր ընդհանուր կազմակերպությունը, առանց վիզայի տարածքը, ազատ առևտրի գոտին, այլ կառույցները։ Հետո զարգացման վեկտորը փոխվեց, կարելի է ասել, 180 աստիճանով, և կենտրոնախույս գաղափարների փոխարեն սկսեցին գերիշխել ստեղծարար գաղափարները։ Ես չեմ խոսում ՀԱՊԿ-ի մասին, երբ պետությունները միասին ստեղծեցին պաշտպանական համակարգ, մենք ունենք ԵՏՄ, որը շատ ակտիվ է գործում է և ընդլայնվելու է»,- նշեց նա։
Նյութի ռուսերեն տարբերակը
