ԵՐԵՎԱՆ, 20 դեկտեմբերի — Sputnik, Լաուրա Սարգսյան. Բեռլինում տեղի ունեցած սարսափելի դեպքից առաջ որոշ իրադարձություններ են եղել, որոնք ստիպել են նկարիչ Արչի Գալենցին հրաժարվել Բեռլինի տոնավաճառ այցելելու մտքից:
«Երեք օր առաջ գերմանական ԶԼՄ-ները հայտնեցին, որ Գերմանիայի քաղաքներից մեկում 12 տարեկան մի տղայի են բռնել, որը փորձել է նռնակ պայթեցնել Ծննդյան տոների կապակցությամբ կազմակերպված տոնավաճառում»,- ասաց Գալենցը:
Նման փորձեր են արվել և՛ նոյեմբերին, և՛ դեկտեմբերին: Հենց այս իրադարձություններ էլ ստիպել են, որ Գալենցը զգուշանա:
Նրա խոսքով՝ Գերմանիայում շատ են նմանատիպ տոնավաճառները, որոնք կազմակերպվում են տոներից առաջ և մեծ թվով այցելուների են գրավում, հատկապես՝ զբոսաշրջիկների:
Գալենցը նախօրեին անցել է տոնովաճառի մոտով, մտածել է տոնավաճառ գնալու մասին, բայց հետո որոշել է շտապել կնոջ ու մանկահասակ երեխաների մոտ:
«Ես հետևում էի Թուրքիայի նորություններին, Ռուսաստանի դեսպանի սպանության վերաբերյալ տեղեկություններ էի կարդում, երբ հանկարծ իմացա, որ մեզ մոտ էլ նման բան է եղել»,- պատմեց նկարիչը:
Արչի Գալենցը Բեռլինում է բնակվում 1991 թվականից:
«Ռոսիա» հեռուստաընկերությունը, հղում անելով Բեռլինի կոմիսարին, հայտնում է, որ վարորդը բեռնատարը դիտավորյալ է ուղղել մարդկանց կողմ: Համացանցի օգտատերերից շատերը տեղի ունեցածը համեմատում են Նիցցայում տեղի ունեցած դեպքի հետ, երբ Բաստիլի գրավման օրվան նվիրված հրավառության ժամանակ բեռնատարը մտել էր ամբոխի մեջ, և վարորդը զիգզագաձև վարելով` անցել էր 2 կմ` վրաերթի ենթարկելով մարդկանց, ինչպես նաև կրակ էր բացել նրանց ուղղությամբ։ Զոհվել էր 84 մարդ, վիրավորվել` ավելի քան 200-ը։
Բեռլինում այս գիշեր բեռնատարը մխրճվել է Ծննդյան տոների կապակցությամբ կազմակերպված տոնավաճառի այցելուների բազմության մեջ: Վերջին տվյալով՝ 9 մարդ զոհվել է, 50-ը տարբեր աստիճանի մարմնական վնասվածքներ են ստացել:
