ԵՐԵՎԱՆ, 20 դեկտեմբերի — Sputnik, Լաուրա Սարգսյան. Բեռլինում բնակվող հայ ատամնաբույժի ընտանիքը տանն է եղել այն պահին, երբ քաղաքի կենտրոնում կազմակերպված տոնավաճառի բազմության մեջ բեռնատար է մխրճվել:
«Փառք Աստծուն, որ մենք այդ պահին տանն ենք եղել, պատահածի մասին իմացանք սոցցանցերից: Բայց չեմ հասկանում, թե այդքան մեծ բեռնատարն ինչպես կարող էր հայտնվել հրապարակում»,- Sputnik Արմենիայի թղթակցի հետ զրույցում ասաց Բեռլինում բնակվող ատամնաբույժ Հայկ Աղաբաբյանը:
Նրա խոսքով՝ հսկա բեռնատարը հայտնվել է մի վայրում, որտեղ Բեռլինի ամենամեծ տոնավաճառներից մեկն է գործում, և այդտեղ հիմնականում զբոսաշրջիկներ են հավաքվում:
Համաշխարահային ԶԼՄ-ները հայտնում են, որ իրավապահ մարմինները դեպքի առնչությամբ տարբեր վարկածներ են ուսումնասիրում, այդ թվում՝ ահաբեկչության տարբերակը:
«Ռոսիա» հեռուստաընկերությունը, հղում անելով Բեռլինի կոմիսարին, հայտնում է, որ վարորդը բեռնատարը դիտավորյալ է ուղղել մարդկանց կողմ: Համացանցի օգտատերերից շատերը տեղի ունեցածը համեմատում են Նիցցայի դեպքի հետ, երբ Բաստիլի գրավման օրվան նվիրված հրավառության ժամանակ բեռնատարը մտել էր ամբոխի մեջ, և վարորդը զիգզագաձև վարելով` անցել էր 2 կմ` վրաերթի ենթարկելով մարդկանց, ինչպես նաև կրակ էր բացել նրանց ուղղությամբ։ Զոհվել էր 84 մարդ, վիրավորվել` ավելի քան 200-ը։
Բեռլինում այս գիշեր բեռնատարը մխրճվել է Ծննդյան տոների կապակցությամբ կազմակերպված տոնավաճառի այցելուների բազմության մեջ: Վերջին տվյալով՝ 9 մարդ զոհվել է, 50-ը տարբեր աստիճանի մարմնական վնասվածքներ են ստացել:
