ԵՐԵՎԱՆ, 20 դեկտեմբերի — Sputnik. Վարդան Ոսկանյանը կարևորում է Իրանի Իսլամական հանարպետության նախագահի սպասվող այցը: Նրա դիտարկմամբ՝ հայ-իրանական հարաբերությունները գնալով ջերմանում են: Համագործակցությունը տարբեր ոլորտներում մեծ թափ է ստանում, ինչը պայմանանվորված է երկու երկրների շահերով: Վարդան Ոսկանյանի խոսքով՝ մեծացել է վստահությունը հայ-իրանական հարաբերություններում. «Վստահության մակարդակի կարևոր ցուցիչ է երկու երկրների միջև վիզային ռեժիմի չեղարկումը, որի շնորհիվ Հայաստանի և Իրանի քաղաքացիները կարող են միայն սահմանին անձնագիր ներկայացնելով գնալ Իրան կամ գալ Հայաստան:
Եթե դիտարկենք դրան հաջորդած մյուս քայլը՝ հայկական մեքենաների մուտքը Իրան թույլատրելուն միտված համաձայնագրի ստորագրումը, ապա փաստացի մենք ստանում ենք լայն հնարավորություն Պարսից ծոցից մինչև Սև ծով ճամփորդելու, հյուսիս-հարավ միջանցքի ազատ տեղաշարժի հնարավորություն»,-ընդգծում է իրանագետը:
Նրա դիտարկմամբ՝ այս քայլով մենք կունենանք կարևոր հնարավորություն՝ Հայաստանը դարձնելու կապող օղակ Պարսից ծոցի և Սև ծովի միջև: Այդ միջանցքը ենթադրում է նաև էներգ
ակիների տեղափոխություն, որի շուրջ Հայաստանն ու Իրանը ակտիվ աշխատում են: Այս առումով Հայաստանն արդեն ունի ձեռքբերում. դա Իրանում իրանական գազը Վրաստանին վաճառելու վերաբերյալ նախաստորագրված հուշագիրն է:
Այդ գործընթացները շարունակելու դեպքում մենք կկարողանանք լիարժեք հարաբերություններ ունենալ նշված ոլորտներում թե՛ Վրաստանի, թե՛ Իրանի հետ։ Կհաղթահարենք և անիմաստ կդարձնենք թուրք-ադրբեջանական շրջափակումը, ինչը բացահայտ թշնամական քայլ է` միտված մեր երկիրը թուլացնելուն և տարածաշրջանային գործընթացներից դուրս թողնելուն»,- ասում է Ոսկանյանը։ Իրանագետը վստահեցնում է, որ Վրաստանի և Իրանի հետ լիարժեք հարաբերությունները չափազանց կարևոր են նաև հոգեբանական առումով, քանի որ նման շրջափակման հետևանքով հասարակության մեջ ձևավորված կարծրատիպը ենթադրում է Հայաստանը դիտարկել որպես փակուղային երկիր: Այդ կարծրատիպը կարող է 180 աստիճանով շրջվել։ «Հայաստանում փակուղային տրամադրությունները պետք է փոխվեն խաչմերուկայինի, դրանից է բխում նաև հասարակության ակտիվ մասնակցությունն ու Հայաստանի ապագայի վերաբերյալ լավատեսության աճը»,- ասում է Ոսկանյանը։
