ԵՐԵՎԱՆ, 20 դեկտեմբերի – Sputnik.Արմեն Աշոտյանը Տեր-Պետրոսյանի ելույթը պատահական չի համարում։ Նրա բնորոշմամբ` ՀԱԿ-ը վերջին շրջանում քաղաքական էներգիա էր կորցրել, իսկ իրենց համար էներգիայի բացառիկ աղբյուրը առաջին նախագահն է: «Ակնհայտ էր, որ ՀԱԿ-ի նկատմամբ հանրային ուշադրություն կարող էր բերել Լևոն Տեր-Պետրոսյանի ելույթը: Ուստի համագումարի համար ճիշտ ժամանակ էր ընտրված` քաղաքական մարկետինգի տեսանկյունից: Բնական ընկալեք, որ ՀՀԿ-ն այս օրակարգի քննարկմանը չի լծվում, այն է՝ «ռասկրուտկային», որովհետև ՀՀԿ-ն սեփական քաղաքական օրակարգ ունի»,- ասաց Արմեն Աշոտյանը:
Լեռնային Ղարաբաղի հակամարտության կարգավորման վերաբերյալ ՀՀ առաջին նախագահ Լևոն Տեր-Պետրոսյանի դիտարկումներում երկու խնդիր է նկատել Աշոտյանը: «1-ին խնդիրն այն էր, թե արդյո՞ք պատեհ պահն էր ապրիլյան պատերազմից հետո խոսել հնարավոր կարմիր գծերի մասին, որ Հայաստանը, ըստ Տեր-Պետրոսյանի, կարող է իրեն թույլ տալ: Արդյո՞ք պահն է հարսանիքից առաջ որոշել թոռան անունը: 2-րդը` արդյո՞ք աշխարհաքաղաքական տեսանկյունից ճիշտ է, երբ քո՝ ռադիկալ համարվող ընդդիմությունը, փորձում է ավելի ճկուն ու «բարիշող» հանդես գալ, քան իշխանությունը: Արդյո՞ք պահն էր, որ երկրի քաղաքական վերնախավն այսպես դիրքավորվեր, որ Հայաստանն ավելի ուժեղ դիրքերից հանդես գար ԼՂ հարցում: Հարցերի պատասխանները ոչ են»,- ընդգծեց Արմեն Աշոտյանը:
Առաջին նախագահի դիտարկմանը, թե իրենք պատրաստ են օգնել Սերժ Սարգսյանին, որ նա մենակ չմնա, ՀՀԿ փոխնախագահը հակադարձեց, ասելով. «Սերժ Սարգսյանը երբեք մենակ չի եղել, չի մնա ու չի մնալու: Ուստի Լևոն Տեր-Պետրոսյանի ելույթը պետք է փորձել ընկալել որպես երկրի ապագայի մասին անհատի կարծիք»:
