ԵՐԵՎԱՆ, 19 դեկտեմբերի — Sputnik. Երևանում «Արմենֆիլմ» կինոստուդիան որոշել են վերականգնել այն բանից հետո, երբ այն վերադարձավ պետությանը։
Գրեթե 10 տարի ստուդիան գտնվում էր մասնավոր սեփականատիրոջ ձեռքում։ Այս ժամանակահատվածում այնտեղ ոչ մի ֆիլմ չի նկարահանվել։ Անգործության տարիների ընթացքում շինությունն անպետք դարձավ, նույնիսկ կահույքն ու սարքավորումները դուրս հանեցին։ Ներդրողները պետք է միլիոնավոր դոլարներ ներդնեին, սակայն չկատարեցին խոստումը, ասվում է ՄԻՐ հեռուստաալիքի ռեպորտաժում։
«Հայֆիլմն» այսօր կրկին պետության ձեռքում է։ Նոր տնօրենը` Դավիթ Կարապետյանը, գերադասում է չհիշել անցյալի մասին։ Ներկայացնում է անելիքները։
«Երկու հիմնական տաղավարները կապիտալ վերանորոգման կարիք ունեն, տանիք չկա։ Մենք արդեն վերականգնել ենք երկու սենյակ, որտեղ այժմ տեսահոլովակներ և գովազդային հոլովակներ են նկարահանվում։ Մեր ռեժիսորները մտադրված հենց այս տարածքներն են վարձակալում, որպեսզի ներդրում ունենան կինոարտադրության վերականգնման մեջ»,- նշել է «Հայֆիլմ» կինոստուդիայի տնօրենի պաշտոնակատարը։
Ռեժիսորներն ասում են, որ ամբողջ կինոստուդիան վերականգնելն իմաստ չունի։ Այլ դար է` այլ տեխնոլոգիաներ։ Արդեն հսկայական արտադրամասեր պետք չեն։ Ազգային կինո նկարահանելու համար մեկ մասնաշենքը բավական է։
«Նման մեծ տարածք ոչ ոքի պետք չէ, այսօր սա անիմաստ է։ Կինոֆաբրիկան արտադրական գործընթացով և նոր տեխնիկայով վերականգնելու համար առնվազն 5-6 մլն դոլար է հարկավոր»,- նշել է Հայաստանի կինեմատոգրաֆիստների միության նախագահ Ռուբեն Գևորգյանցը։
Վերանորոգման գումարը կհատկացնի պետությունը։ Մշակույթի նախարարությունում ուզում են պահպանել «Հայֆիլմ» բրենդը։ Արդեն հաջորդ տարի այնտեղ կրկին մեծ կինո կնկարահանեն։ Նկարահանումները մտադիր են սկսել հունվարին, պլանավորվում է Իտալիայի և Ռուսաստանի հետ համատեղ ֆիլմեր նկարահանել։
