ԵՐԵՎԱՆ, 16 դեկտեմբերի — Sputnik. Արմեն Ջիգարխանյանի անվան թատրոնի աշխատակիցներին ազատել են աշխատանքից, և նրանց խոսքով՝ հեռացրել են առանց պատճառները բացատրելու։ Թատրոնի աշխատակիցները վստահեցնում են` ռեժիսորի ընտրյալը` Վիտալինա Ցիմբալյուկ-Ռոմանովսկայան, անօրինական գործողություններ է թույլ տալիս նրանց նկատմամբ, ովքեր երկար տարիներ նվիրված են եղել թատրոնին, գրում է Starhit-ը։
Վերջին շրջանում Ջիգարխանյանը դատական ծանուցումներ է ստանում գործընկերներից։ Թատրոնի աշխատակիցների կարծիքով` իրենց նկատմամբ կատարված գործողությունները հակասում են Աշխատանքային օրենսգրքին։
Նրանք պատմել են, որ իրենց կանչել են կադրերի բաժին և առանց պատճառի հեռացրել աշխատանքից։
Դերասանուհի Դանա Նազարովան նշել է, որ պետք է արձակուրդի գնար` երեխային խնամելու համար, բայց երբ եկել է անհրաժեշտ փաստաթղթերը ձևակերպելու, նրան տվել են աշխատանքային գրքույկը և խնդրել լքել տարածքը։ Նազարովային զարմացրել է նման վերաբերմունքը:
Դերասանուհին դիմել է դատարան և հույս ունի, որ կշահի գործը։
