ԵՐԵՎԱՆ, 15 դեկտեմբերի-Sputnik. Մի շարք ՏՏ ընկերությունների աշխատակիցներ հրաժարվել են օգնել ԱՄՆ կառավարությանը` մարդկության դեմ կատարած հանցագործությունների` այդ թվում նաև Հայոց ցեղասպանության չընդունման պատճառով։ Այդ մասին ասվում է neveragain.tech բաց կայքում տեղադրված ուղերձում։
Ներգաղթյալների մասին տվյալների բազա ստեղծելու գաղափարը պատկանում է ԱՄՆ նորանշանակ նախագահ Դոնալդ Թրամփին։ Թրամփի նախաձեռնությանն իրենց անհամաձայնությունն են հայտնել և ուղերձի տակ ստորագրել են այնպիսի ընկերությունների աշխատակիցներ, ինչպիսիք են Twitter, Google, Software Engineer, IBM և Microsoft։ «Մենք խոստովանում ենք, որ Օսմանյան կայսրությունում զանգվածային բռնագաղթը և չարագործությունները` 1,5 միլիոն հայերի նկատմամբ, տեղ են ունեցել մինչև «ցեղասպանություն» բառի հայտնվելը։ Մենք գիտակցում ենք, որ ցեղասպանությունները միայն անցյալի խնդիրներ չեն, քանի որ Ռուանդայում և Բոսնիայում նման հանցագործությունները կատարվում են մեր օրերում»,- ասվում է հաղորդագրությունում։
Առաջատար ընկերությունների ներկայացուցիչներն իրենց ստորագրությունն են թողել ուղերձի տակ` հրաժարվելով մասնակցել քաղաքացիների մասին ԱՄՆ կառավարության համար տվյալների բազայի ստեղծմանը, քանի որ դա կարող է օգտագործվել ռասայական, ազգային և կրոնական հողի վրա հետապնդումներ կազմակերպելու մեջ։
«Այսօր մենք միասին ենք, որպեսզի ասենք` ոչ մեր աչքի առաջ, չի կրկնվի։ Մենք կբարձրացնենք իրազեկության մակարդակը և քննադատաբար կմոտենանք քաղաքացիների անձնական տվյալների արդար և պատասխանատու օգտագործման հարցերին ինչպես մեր կազմակերպությունների ներսում, այնպես էլ դրանցից դուրս»,- ասվում է ուղերձում։ Ուղերձը հրապարակվել է ԱՄՆ առաջատար տեխնոլոգիական ընկերությունների ղեկավարների հետ Դոնալդ Թրամփի հանդիպման նախաշեմին։
