ԵՐԵՎԱՆ, 15 դեկտեմբերի — Sputnik. Ազգային ժողովի արտահերթ նիստում քննարվեց «Գնումների մասին» ՀՀ օրենքի նախագիծը երկրորդ ընթերցմամբ ընդունելու մասին հարցը: Ֆինանսների նախարար Վարդան Արամյանը, ներկայացնելով նախագծի հիմնական փոփոխությունները, նշեց, որ արված առաջարկությունները հիմնականում ընդունվել են, որի արդյունքում օրենքն ավելի է հղկվել:
Օրինագծով սահմանվում է, որ գնման մրցույթի մասնակիցներն իրավունք կունենան ծանոթանալ միմյանց ներկայացրած գնային առաջարկներին, ինչի արդյունքում, նախագծի հեղինակների համոզմամբ, իրականում կառաջարկվի ամենացածր գինը և կհաղթի այն առաջարկած կազմակերպությունը:
Բայց գնումների գործընթացն առավել բաց ու թափանցիկ դարձնելուն զուգահեռ օրենքում առաջարկվում է ավելացնել մեկ դրույթ ևս, որը հակառակը` որոշակի գաղտնիություն ու սահմանափակում է մտցնելու գնման գործընթացին վերաբերող տեղեկատվության հրապարակման հարցում: Նախագծով առաջարկվում է հանրապետության նախագահի, վարչապետի, ԱԺ նախագահի արարողակարգային գնումները համարել պետական գաղտնիք և ն:
«Սա անվտանգության կարևորագույն նորմ է: Կարծում ենք՝ ճիշտ է, որ այդ ծախսերը, որոնք կապված են այս երեք գլխավոր պաշտոնների բնականոն աշխատանքի ապահովման համար, դիտենք որպես պետական գաղտնիք պարունակող գնումներ»,- ասաց Արամյանը` հավելելով, որ այս դրույթը նախագծում ներառվել է միջազգային փորձն ուսումնասիրելուց հետո:
