ԵՐԵՎԱՆ, 15 դեկտեմբերի-Sputnik. ԱԺ-ն այսօր երկրորդ ընթերցմամբ քննարկեց ԱԺ կանոնակարգ օրենքում առաջարկվող փոփոխությունների նախագիծը:
Այս օրինագծով ԱԺ-ը ՏԻՄ և գործադիր իշխանության մարմինների նկատմամբ վերահսկողության իրավունք կստանա, պատգամավորն էլ` ՏԻ մարմիններին դիմելու և այնտեղից պատասխաններ պահանջելու: Այդուհանդերձ, խորհրդարանական վերահսկողության դրույթը, պատգամավորների համոզմամբ, դեռևս լիարժեքորեն չի տրամադրում այն լծակները, որով պատգամավորները կարող են վերահսկել կառավարության գործունեությունը: Հատկապես 2018թ-ից հետո, երբ, ինչպես իր ելույթում հիշեցրեց ԱԺ ՀԱԿ խմբակցության պատգամավոր Գագիկ Ջհանգիրյանը, նախագահի ինստիտուտն այլևս չի ունենալու այն ուժեղ վերահսկողական ֆունկցիան, որով օժտված է այսօր:
«Մենք մոռանում ենք, որ ապագայում առաջնային մանդատ ունեցող նախագահի ինստիտուտը վերանալու է, և մենք այսօր նախագահի ինստիտուտի առկայության կոմպլեքսի մեջ ենք: Չենք կարողանում պատկերացնել, որ 2018թ-ից հետո, երբ այդ առաջնային մանդատ ունեցող ինստիտուտը չլինի, մնալու է մեկ առաջնային մանդատ ունեցող ինստիտուտ` ԱԺ-ը, որը չի կարող հանդիսատեսի կարգավիճակում հանգիստ դիտել գործադիրի աշխատանքը»,- ասաց Ջհանգիրյանը` հավելելով, որ 2018թ-ից հետո ԱԺ-ը պետք է բոլոր լծակներն ունենա վերահսկելու կառավարության աշխատանքը:
ԱԺ ԲՀԿ խմբակցության ղեկավար Նաիրա Զոհրաբյանն էլ համոզմունք հայտնեց, որ 2017թ-ի ապրիլյան ընտրություններից հետո, ԱԺ-ի նոր կանոնակարգ օրենքով աշխատելը որոշ պատգամավորների համար տառապանք է լինելու:
«Ոչ պրոֆեսիոնալների, ժամավաճառությամբ զբաղվողների համար 2017թ-ին ուղղակի տառապանք է դառնալու Աժ-ում նստելը, որովհետև դիսկոմֆորտը խիստ մեծ է լինելու»,- ասաց նա,- «ուստի այն պատգամավորները, ովքեր որպես հարակից ատրիբուտ տարիների ընթացքում ունեցել են մանդատը, երկար պիտի մտածեն` այդ մանդատն իրենց պետք է, թե՞ լրացուցիչ գլխացավանք է դառնալու իրենց համար»:
ԲՀԿ-ն առաջին ընթերցումից հետո առաջարկ էր ներկայացրել ԱԺ կանոնակարգ օրենքում ամրագրել դրույթ, որը կարգելեր խմբակցությունից դուրս եկող պատգամավորին օգտվել խմբակցություններին տրված լիազորություններից:
Այս մասին խոսելիս` Նաիրա Զոհրաբյանն իր ելույթում բերեց հարազատ կուսակցության ու խմբակցության օրինակը: 2007 և 2012թթ.-ի խորհրդարանական ընտրություններում, ըստ Զոհրաբյանի, ընտրողներն իրենց ձայները տվել են Գագիկ Ծառուկյանին և կուսակցության նախընտրական ծրագրին և ոչ թե կուսակցության շարքային անդամներին: Ուստի խմբակցությունից հետագայում դուրս եկող պատգամավորները պետք է հրաժարվեն նաև խմբակցության ստանձնած պարտավորություններից: Հակառակ դեպքում, պարտավոր են ենթարկվել խմբակցության որոշումներին և քվեարկությունների ժամանակ քվեարկեն այնպես, ինչպես ճիշտ է համարում խմբակցությունը: Զոհրաբյանը իր վերացական հայտարարությունը հասցեագրեց դահլիճում գտնվող ԲՀԿ-ից հեռացած պատգամավորներին:
