ԵՐԵՎԱՆ, 15 դեկտեմբերի — Sputnik. ԱԺ-ն այսօր արտահերթ նիստում երրորդ ընթերցմամբ և ամբողջությամբ ընդունեց «1000 դրամների օրենք» որակումը ստացած «Հայաստանի Հանրապետության պաշտպանության ժամանակ զինծառայողների կյանքին կամ առողջությանը պատճառված վնասի փոխհատուցման մասին» օրինագիծը և ուղեկցող օրինագծերի փաթեթը:
Երկրորդ ընթերցմամբ ընդունվեց նաև «Հասարակական կազմակերպությունների» և «Կուսակցությունների մասին» օրենքների նախագծերը:
ԱԺ-ի ուշադրության կենտրոնում, սակայն, ոչ այնքան քվեարկվող օրինագծերն էին, որքան քվեարկությունների օրինականությունը: «Կուսակցությունների մասին» օրենքի նախագծի քվեարկության ժամանակ ԱԺ պատգամավոր Թևան Պողոսյանը հայտարարեց, որ բացակա պատգամավորներից մեկի փոխարեն քվեարկել են: Նիստը վարող ԱԺ նախագահ Գալուստ Սահակյանը հանձնարարեց 1 կողմ ձայնը հանել: Բայց Թևան Պողոսյանի հայտարարությունն արդեն դահլիճում իրարանցում էր առաջացրել: Գործընկերներից մեկն անգամ նրան «գործ տվող» անվանեց:
Հաջորդ իրարանցում առաջացրած հայտարարության հեղինակն էլ Նիկոլ Փաշինյանն էր, ով ուշադրություն հրավիրեց մամուլում առկա այն հրապարակումների վրա, որտեղ ահազանգվում է, թե ԱԱԾ աշխատակիցները վերջին օրերին քաղաքացիական ակտիվիստներին հրավիրում են «զրույցի»:
«Սա հետապնդում է նրանց քաղաքական և հասարակական գործունեության համար, սա բացահայտ ապօրինություն է: Ես հորդորում եմ Ազգային անվտանգության ծառայողներին զերծ մնալ, դադարեցնել իրենց ապօրինի գործունեությունը»,- ասաց Փաշինյանը:
Այս հայտարարությունն աղմկոտ քննարկումների տեղիք տվեց, որոնց հետևանքով նիստը վարողը րոպեներ շարունակ չէր կարողանում շարունակել այն:
Հիշեցնենք, օրերս երաժիշտ Վահան Արծրունին մամուլում հայտարարել էր, որ հրավիրվել է ԱԱԾ` նշելով, որ իր համար պարզ չէ հրավերի նպատակն ու պատճառը:
