Լաուրա Սարգսյան, Sputnik.
Հայաստանի ու Վրաստանի սպորտի և երիտասարդության հարցերի նախարարներ Հրաչյա Ռոստոմյանի ու Տարիել Խեչիկաշվիլիի երևանյան հանդիպման հիմնական թեմաներից մեկը վերաբերում էր միջազգային մրցաշարերի անցկացմանը։
«Վրաստանն այն երկրներից է, որը Եվրոպայի, աշխարհի առաջնություններ ու միջազգային մրցաշարեր է անցկացրել։ Նման ներուժ կա նաև Հայաստանում, ինչը նշանակում է, որ մենք կարող ենք այս կամ այն առաջնությունը համատեղ անցկացնել», — ասել է Խեչիկաշվիլին։
Մի դեպքում առաջնության տերը, հիմնական ընդունող կողմը կարող է լինել Հայաստանը, մյուս դեպքում` Վրաստանը։ Ընդ որում` այս կամ այն մրցումների որոշ փուլեր կանցկացվեն միաժամանակ երկու երկրում։
Մեր հարևանները նախատեսում են համատեղ հավաքներ, բաց առաջնություններ և ընկերական խաղեր անցկացնել։ Հայաստանն ու Վրաստանն արդեն համագործակցում են մի շարք մարզաձևերում, երիտասարդության մերձեցմանն ուղղված նախագծեր իրականացնում։
Վրացի նախարարը կարծում է, որ մարզական ընթացիկ տարին կարևոր էր երկու երկրի համար։ Նա շնորհավորեց հայերին և վրացիներին մարզական հաջող տարվա ավարտի կապակցությամբ։
«Օլիմպիադան ցույց տվեց, որ մեր երկրները մարզական լավ ներուժ ունեն։ Մենք պետք է ամեն ինչ անենք, որպեսզի մեր արդյունքները բարելավենք հաջորդ օլիմպիադաների ժամանակ», — ասաց Խեչիկաշվիլին։
Նրա խոսքով` Վրաստանում անցկացվող բարեփոխումները կարող են հետաքրքիր լինել Հայաստանի համար և հակառակը, ինչը նշանակում է, որ փորձի փոխանակումն անչափ կարևոր է։ Խեչիկաշվիլիի խոսքով` կարևոր է նաև գործարարների ցուցաբերած օգնությունը սպորտին։ Նրա կարծիքով` Հայաստանի օրինակն այս առումով աննախադեպ է։
Վրաստանն այս հարցում զիջում է Հայաստանին, թեև ներդրողները, բանկերն ու ապահովագրական ընկերությունները օգնում են նաև վրացական սպորտի զարգացմանը։
«Ամռանը մենք ծրագրում ենք մեզ մոտ հրավիրել հայ երիտասարդներին։ Նման նախագծերը կօգնեն, որ երիտասարդներն ապագայում խաղաղ Կովկաս կառուցեն», — նշեց Խեչիկաշվիլին։
Նրա կարծիքով` հատկապես երիտասարդների գործակցությունը թույլ կտա, որ Հայաստանն ու Վրաստանը չեզոքացնեն հայ-վրացական բարեկամական հարաբերություններին ուղղված սադրանքները, քանի որ այդ բարեկամությունը հարյուրամյակների պատմություն ունի։
Նյութի ռուսերեն տարբերակը
