ԵՐԵՎԱՆ, 14 դեկտեմբերի — Sputnik. Նովոսիբիրսկից «ՊԿԲ Սոլո» ընկերությունը, Հայաստանում ՌԴ առևտրային ներկայացուցչության միջնորդությամբ, «Մարի Իզմիրլյանի» անվան մանկատանը նվիրել է մասնագիտացված հեծանվային մարզասարք` մանկական ուղեղային կաթվածով տառապող երեխաների հենաշարժողական ֆունկցիան վերականգնելու համար։
«Ընկերությունը ցանկանում է ընդլայնել իր արտադրանքի սպառման շուկան, առավել ևս, որ մասնագիտացված հեծանվային մարզասարքը պահանջված է և իսկապես օգնում է վերականգնվել մանկական ուղեղային կաթված ունեցող և աուտիզմով տառապող երեխաներին։ Առաջին նմուշը մենք ուզում ենք նվիրել մանկատանը, որպեսզի երեխաների վերականգնման մեջ շահագրգիռ մարդիկ համոզվեն դրա արդյունավետության մեջ», — Sputnik Արմենիային ասաց ընկերության տնօրեն Ալեքսանդր Իզոտովը։ Նրա խոսքով`մարզասարքը և՛ որակով, և՛ գնով տարբերվում է արտասահմանյան նման սարքերից ։
Հեծանիվը նախատեսված է 3-14 տարեկան երեխաների համար. մասնագիտացված հեծանիվի չափերը կարելի է նաև կարգավորելով փոփոխել ։ Բացի դա, հեծանիվի վրա կարելի է տեղադրել կարգավորվող էլեկտրական շարժակ` ոտնակների պարտադիր շարժման համար։
Ամենակարևորն այն է, որ հեծանիվը կարելի է օգտագործել նաև որպես սովորական` փողոցներում զբոսնելու համար, ինչպես նաև տանը` որպես մարզասարք։ Այն հիմնականում արտադրվում է Նովոսիբիրսկում։ Ունի մոտ 35 կգ քաշ։
Հեծանիվը միանգամից փորձարկեցին ուղեղային կաթվածով տառապող երեխաները։ Սկզբում նրանք անվստահ էին, սակայն առաջին պտույտից հետո սկսեցին գոհ ժպտալ։
Իզմիրլյան մանկատան տնօրենի տեղակալ Արմինե Պետրոսյանը երախտագիտություն հայտնեց նման նվերի համար, քանի որ շարժվող այս մարզասարքն առաջինն է հաստատությունում։
Նրա խոսքով` մասնագիտացված մանկատանը ավելի քան 40 երեխա կա` ուղեղային կաթված ախտորոշմամբ, և նման մարզասարքերն անհրաժեշտ են շարժողական ֆունկցիայի զարգացման համար։
Նյութի ռուսերեն տարբերակը` այստեղ
![Российская компания ПКБ Соло подарила армянскому детдому велотренажер для реабилитации детей с ДЦП Российская компания ПКБ Соло подарила армянскому детдому велотренажер для реабилитации детей с ДЦП - Sputnik Արմենիա](https://cdn.am.sputniknews.ru/img/578/60/5786081_0:0:1498:1000_600x0_80_0_0_bebef544c890261e857377fb34786e86.jpg)