ԵՐԵՎԱՆ, 14 դեկտեմբերի — Sputnik. Հայաստանում կարատեի շուրջ 180 ֆեդերացիա կա, որոնցից յուրաքանչյուրն իրեն լավագույնն է համարում, բայց ՀՀ սպորտի և երիտասարդության հարցերի նախարարությունն այս կազմակերպությունների գործունեությանը հոռետեսորեն է վերաբերվում։
«Կարատեի գործող ֆեդերացիաներից շատերը «կեղծ» են, և այդ հարցը լուծելու համար մենք ֆեդերացիաների լիցենզավորման համակարգ կներդնենք», — մամուլի ասուլիսի ժամանակ ասաց Հայաստանի սպորտի և երիտասարդության հարցերի նախարար Հրաչյա Ռոստոմյանը։
Նրա խոսքով` կարևոր է իմանալ` արդյո՞ք երիտասարդների հետ աշխատող մարզիչն ունի անհրաժեշտ հմտություններ և արդյո՞ք ֆեդերացիան համապատասխանում է պահանջվող ստանդարտներին։
Հաջորդ տարի սպորտի նախարարությունը կփորձի լուծել սպորտի մասսայականացման հարցը։ Այս նպատակով նախարարությունը պատրաստվում է մի շարք ծրագրեր իրականացնել։
«Միջնակարգ դպրոցներում ֆիզկուլտուրայի նկատմամբ անլուրջ վերաբերմունք կա։ Տարրական դասարաններում ֆիզկուլտուրան դասավանդում են դասղեկները, սակայն փաստն այն է, որ ոչ բոլոր դասղեկներն ունեն անհրաժեշտ գիտելիքներ», — ասաց Ռոստոմյանը։
Հաճախ ֆիզկուլտուրան հետին պլան է մղվում. այսուհետև այդ հարցով կզբաղվի Հայաստանի սպորտի և երիտասարդության հարցերի ու կրթության և գիտության նախարարությունների ստեղծած հատուկ կոմիտեն։
Սպորտի և երիտասարդության հարցերի նախարարության հիմնական ուղղություններն են` զանգվածային սպորտի զարգացում, սպորտային բարձր արդյունքների ապահովում, ինչպես նաև ազգային հավաքականների զարգացում ու սպորտում կադրային գրագետ քաղաքականության վարում։
Նյութի ռուսերեն տարբերակը
