ԵՐԵՎԱՆ, 4 նոյեմբերի – Sputnik. «Ես ստոմատոլոգ եմ, ոչ թե ատամնաբույժ»,– պատասխանելով Հայաստանի ֆուտբոլի ֆեդերացիայի նախագահ Ռուբեն Հայրապետյանի երեկվա հայտարարությանը` հայտարարեց Սպորտի և երիտասարդության հարցերի նախարար Հրաչյա Ռոստոմյանը:
Նախարարը նաև պարզաբանեց, թե որն է տարբերությունը. «Ատամնաբույժը ատամ բուժողն է, ստոմատոլոգը՝ բերանի խոռոչի մասնագետը»:
«Ես հպարտանում եմ իմ առաջին մասնագիտությամբ և աշխատել են Արագածոտնի մարզի Ագարակ գյուղում, ապա դասավանդել Բժշկական համալսարանում և հետո սովորել արդեն ֆիզիկական կուլտուրայի ինստիտուտում»,- ասաց Ռոստոմյանը:
Ինչ վերաբերում է ֆուտբոլի հարցերին չմիջամտելու ՀՖՖ նախագահի խորհրդին, նախարարը նշեց, որ երբ որևէ խնդիր է տեսնում, չի կարող չմիջամտել:
«Ֆուտբոլը մեր ազգը կարող է միացնել, անգամ հակառակորդներին կարող է միավորել, երբ մեր թիմը հաղթանակ է տանում: Եվ հակառակը՝ երբ մեր թիմը պարտվում է, անգամ ամենահարազատ մարդիկ տրամադրություն չեն ունենում և նեղվածությունը խորանում է,- ասաց Ռոստոմյանը՝ հավելելով` ամեն ինչ պետք է անենք, որ մեր լեգենդար ֆուտբոլի ավանդույթները շարունակվեն և մեր ազգային հավաքականը լինի հաղթական կարիերայի մեջ:
Իսկ ինչ վերաբերում է Ռուբեն Հայրապետյանի` իրեն ուղղված խորհուրդներին ու գնահատականներին, նախարարը ձեռնպահ մնաց մեկնաբանությունից ՝ նշելով, միայն, որ վերջինը իրեն խորհուրդ տվողների ցանկում չէ:
Հիշեցնենք, նոյեմբերի 3-ին հրավիրած մամուլի ասուլիսում Հֆֆ նախագահ Ռուբեն Հայրապետյանն արձագանքել էր Սպորտի և երիտասարդության հարցերի նախարար Հրաչյա Ռոստոմյանի այն հայտարարություններին, թե ֆուտբոլի հարցը կքննարկվի:
«Ես նախարարին խորհուրդ կտայի զբաղվել ատամնաբույժի գործով: Նա այնքան չգիտի ֆուտբոլ ու իրավունք չունի ֆուտբոլով զբաղվել: Եթե նա զբաղվի, ֆուտբոլի ֆեդերացիայի և ՖԻՖԱ-ի կողմից պատժամիջոցների կենթարկվի։ ՖԻՖԱ-ի կանոնագրքի համաձայն` նա իրավունք չունի խառնվելու ֆուտբոլի ֆեդերացիայի հարցերին»,- ասել էր Ռուբեն Հայրապետյանը:
