ԵՐԵՎԱՆ, 11 դեկտեմբերի — Sputnik,Արմենուհի Մխոյան. Թեև ԲՀԿ մարզային գրասենյակը Ծառուկյանի այցի մասին հայտարարություն չէր տարածել, դա չէր խանգարել սոցիալապես անապահով խավին՝ այցի երթուղին ու Ծառուկյանի նպատակները ճշտելու համար:
Իսկ այն, ինչ կատարվեց, երբ Գագիկ Ծառուկյանը, անցնելով ժողովրդի միջով, շարժվեց դեպի հուշակոթողը՝ աննկարագրելի էր, լրագրողներս նման արտակարգ նկարահանում չէինք էլ հիշում, թե վերջին անգամ երբ էինք ունեցել. հրմշտոց ու իրարանցում, բոլորը փորձում էին սոցիալական խնդիրը ներկայացնող նամակն անձամ հանձնել Գագիկ Ծառուկյանին, կամ անձամբ մոտենալ ու զրուցել, մի քանիսին անգամ հաջողվեց տեղում ֆինանսական աջակցություն ստանալ:
Մինչ Ծառուկյանը ծաղկեպսակ կդներ ու մեկ րոպե լռությամբ կհարգեր 1988 թվականի անմեղ զոհերի հիշատակը, նրան տեսնելու եկած ժողովրդի մեջ հանկարծ ուշագնաց եղավ մի տղամարդ:
Ինչպես տեղեկացրին Գյումրու Շտապ բուժօգնության ծառայությունից՝ տղամարդու կյանքը փրկել չի հաջողվել, 55 ամյա Ներսես Մելքոնյանը «Գյումրի» բուժկենտրոն տեղափոխելու ճանապարհին մահացել է:
Թե ինչ վիճակում են տնակում բնակվող շատ գյումրեցիները՝ կարելի էր ճշտել հենց տեղում. ձեռնափայտերով տարեց մարդիկ, նորածիններին գրկած կանայք, ու բոլորի նպատակը մեկն էր՝ Գագիկ Ծառուկյանը լսի իրենց:
Ծառուկյանը մի քանիսին լսեց, ապա շարժվեց «Յոթ Վերք» եկեղեցի, մոմ վառեց, լուռ աղոթեց ու իր շարասյունով ուղղություն վերցրեց դեպի Գյումրու «Ավտոկայան» տնակային ավան, որից հետո այցելեց «Շիրակ» կենտրոն, որտեղ և հայտարարեց, որ «Շիրակ» կենտրոնի անապահով խավին օգնելու նպատակով տրամադրում է 10 մլն դրամ, ևս 30 մլն դրամ կհատկացնի նախկին ԲՀԿ-ական, այժմ անկուսակցական Վարդևան Գրիգորյանին՝ սոցիալապես անապահով ընտանիքներին տրամադրելու համար:
Մեր հայրցին, թե ինչու դեկտեմբերի 7-ից օրեր անց է միայն
Գագիկ Ծառուկյանը «հիշել» ու եկել Գյումրի, վերջինս պատասխանեց. «Ես համբերել եմ, որ բոլորը գան ու գնան և նոր գամ»,-ապա ավելացրեց.- «Ես գյումրեցիներին միշտ հարգել ու սիրել եմ՝ կարգին, ադաթով մարդիկ են»:
Խոսելով քաղաքականություն վերադառնալու մասին՝ ԲՀԿ առաջնորդը խոստացավ այդ մասին հայտարարել մի քանի օրից:
«Քաղաքականությունն ինձ համար ինքնանպատակ չէ: Ես այն մարդկանցից եմ, որ հասել եմ իմ երազանքին, եթե աշխարհի մարդկության 90 տոկոսը չի հասել, ապա ես հասել եմ՝ անձնական խնդիր չունեմ, պաշտոնի կարիք չունեմ:
Ինձ համար կարևորն իմ ժողովուրդն է, իմ ժողովուրդը երջանիկ լինի, արտագաղթ չլինի, պետությունը հզոր լինի: Հզոր պետությունը խնդիր չի ունենա: Այսօր Ղարաբաղի խնդրի հետ կապված, եթե տեսնեն, որ հզոր ենք՝ խաղաղ բանակցային կարգով հարցերը կլուծվեն»,-նշեց Գագիկ Ծառուկյանը՝ հավելելով, որ պետության համար պետք է անձնականը մի կողմ դնել ու համախմբվել:
«Համախմբվելով, պետք է միասնական որոշում կայացնել՝ լինի արդարություն, վստահություն, համախմբում ու մրցակցություն, մրցակցության դեպքում, եթե տղաս էլ մասնակցի՝ հավասարի դեպքում հաղթանակն իրեն չեմ տա, որ ժողովրդի մեջ վստահությունը վերականգնվի»,-նշեց Գագիկ Ծառուկյանը:
