ԵՐԵՎԱՆ, 5 դեկտեմբերի — Sputnik. ԲՀԿ նախկին առաջնորդ Գագիկ Ծառուկյանը վերադառնում է ակտիվ քաղաքականություն: Լրագրողներին հայտնել է ԱԺ ԲՀԿ խմբակցության ղեկավար Նաիրա Զոհրաբյանը՝ հավելելով, որ Ծառուկյանն ընդառաջում է «բազմահազար քաղաքացիների պահանջին»:
Նաիրա Զոհրաբյանը նաև հայտնել է, որ, վերադառնալով, Ծառուկյանը վստահաբար լինելու է ընդդիմադիր դաշտում, քանի որ կուսակցության քաղաքական կուրսը չի փոխել:
Իսկ կգլխավորի արդյոք ԲՀԿ-ն, թե ոչ, Նաիրա Զոհրաբյանը չհստակեցրեց:
«Դա մեր ցանկությունն է, մեր առաջարկն է, որ պարոն Ծառուկյանը կրկին գլխավորի Բարգավաճ Հայաստան կուսակցությունը»,- ասաց նա՝ նշելով, որ Ծառուկյանն առաջիկայում հանդես կգա հրապարակային հայտարարությամբ և կտա բոլոր հարցերի պատասխանները:
«Բարգավաճ Հայաստան» կուսակցության ղեկավար Գագիկ Ծառուկյանն ակտիվ քաղաքականությունից հեռացել է 2015 թվականի գարնանը, ՀՀ նախագահ Սերժ Սարգսյանի հետ կոնֆլիկտից հետո։ Դրանից հետո կուսակցությունն անցավ ընդդիմության դաշտ, սակայն կուսակցության ներկայացուցիչներից շատերը, չցանկանալով զրկվել զբաղեցրած պաշտոններից, լքեցին կուսակցության շարքերը։ Ներկա պահին Սարգսյանի և Ծառուկյանի հարաբերությունները կարգավորվել են։
