ԵՐԵՎԱՆ, 7 դեկտեմբերի — Sputnik. Պաշտպանության նախարարը չի բացառում, որ առաջիկայում կվերանայվի 27 տարին լրացած քաղաքացիներին գումարի դիմաց զինապարտությունից ազատելու մասին ՀՀ օրենքը: Վիգեն Սարգսյանը հայտարարեց, որ ինքը դեմ է այդ օրենքին, բայց, որպես ՀՀ քաղաքացի, հարգում է գործող օրենքը:
«Դեմ եմ, որովհետև գտնում եմ, որ սահմանված կարգով զինծառայությունը պետք է անցնեն և ոչ թե՝ չանցնելու դիմաց վճարեն: Իմ կարծիքով, դա խթանում է այն մարդկանց մղումները, որոնք մտածում են գնալ երկրից, դրսում իրենց խնդիրները լուծել և 27 տարին լրանալուց հետո վճարել ու վերադառնալ երկիր»,- ասաց նախարարը, միաժամանակ, աիշեցնելով, որ օրենքն ընդունվել է, որովհետև կան մարդիկ, որոնք մանկուց են գնացել Հայաստանից, ծնողների հետ և պետք է իրավունք ստանային վերադառնալ ՀՀ:
Օրենքը պարբերաբար թարմացվում է, փոխվում են դրանում նշված ժամկետները: Օրենքի համաձայն՝ 27 տարին լրացած քաղաքացին կարող է վճարել և ազատվել զինվորական ծառայությունից՝ խուսափելու համար իր նկատմամբ հայտարարված հետախուզումից: Վճարելուց հետո քաղաքացին կարող է անարգել գալ Հայաստան:
